ឯកអគ្គរដ្ឋទូតចិនប្រចំានៅអុីស្រាអែល ស្លាប់នៅក្នុងផ្ទះ

ឯកអគ្គរដ្ឋទូតចិនប្រចាំនៅប្រទេសអុីស្រាអែល លោក Du Wei ត្រូវបានគេរកឃើញស្លាប់នៅក្នុងផ្ទះផ្ទាល់ខ្លួនក្នុងជាយក្រុង Tel Aviv កាលពីថ្ងៃទី១៧ខែឧសភា។
តាមសារព័ត៌មាន Jerusalem Post នៅថ្ងៃទី១៧ខែឧសភាបានផ្សាយថា កម្លាំងជំនាញកំពុងបើកការស្រាវជ្រាវពាក់ព័ន្ធនឹងការស្លាប់របស់លោក។ លោក Du Wei អាយុ ៥៨ ឆ្នាំត្រូវបានគេរកឃើញថា ស្លាប់នៅលើគ្រែរបស់គាត់ ហើយមូលហេតុនៃការស្លាប់ មិនទាន់ត្រូវបានគេដឹងនៅឡើយទេ។
លោក Du Wei ទើបតែត្រូវបានតែងតាំងជាឯកអគ្គរដ្ឋទូតក្នុងខែកុម្ភៈ ឆ្នាំ២០២០នេះតែប៉ុណ្ណោះ ។ លោក Du Wei ធ្លាប់បម្រើការជាប្រេសិតចិន ប្រចាំនៅអ៊ុយក្រែនផងដែរ ។
ឯកអគ្គរដ្ឋទូត Du Wei បានរៀបការ និងមានកូនប្រុសម្នាក់ ប៉ុន្តែគ្រួសាររបស់គាត់មិនត្រូវបានគេជឿថា បានរស់នៅក្នុងប្រទេសអុីស្រាអែលនោះទេ ។ លោក Du Wei កំពុងរស់នៅជាយក្រុង Tel Aviv រដ្ឋ Herzliya ប្រទេសអុីស្រាអែល ៕ដោយ៖ធី រីណា