ស្លាប់ម្នាក់ របួសធ្ងន់ម្នាក់ដោយសាររថយន្តបុកកង់

ខេត្តបន្ទាយមានជ័យ៖ ក្មេងស្រីអាយុ១១ឆ្នាំម្នាក់បានបាត់បង់ជីវិតភ្លាមនិងក្មេងប្រុសអាយុ១២ឆ្នាំម្នាក់ទៀតបានរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍ នៅវេលាម៉ោង ៧និង៤៥នាទីយប់ថ្ងៃទី១៧ខែឧសភា ឆ្នាំ២០២០ នៅលើកំណាត់ផ្លូវជាតិលេខ៥៩ ត្រង់ចំណុចគីឡូម៉ែត្រលេខ៤៣-៤៤ ស្ថិតនៅភូមិសង្កែ ឃុំបឹងបេង ស្រុកម៉ាឡៃ ខេត្តបន្ទាយមានជ័យ ។
មន្ត្រីនគរបាលមូលដ្ឋាន បានឲ្យដឹងថា ជនរងគ្រោះក្នុងហេតុការណ៍គ្រោះថ្នាក់ចរាចរណ៍ឈ្មោះ រ៉េន ខាំ ភេទប្រុសអាយុ១២ ឆ្នាំរស់នៅភូមិសង្កែ ឃុំបឹងបេង ស្រុកម៉ាឡៃ ខេត្តបន្ទាយមានជ័យ (របួសបាក់ជើងឆ្វេង) អ្នកជិៈកង់និងអ្នកជិះពីក្រោយមានឈ្មោះ ថេង ស្រីរត្ន័ ភេទស្រី អាយុប្រហែល ១១ឆ្នាំ រស់នៅ ភូមិសង្កែ ឃុំបឹងបេង ស្រុកម៉ាឡៃ ខេត្តបន្ទាយមានជ័យ ។ចំណែករថយន្តម៉ាកតូយ៉ូតាព្រូស ពណ៌ប្រផេះ ស៊េរី២០០៦ ពាក់ស្លាកលេខ ភ្នំពេញ 2BE.7802 អ្នកបើកបរមិនស្គាល់អត្តសញ្ញាណ រត់គេចខ្លួនបាត់ ។
នគរបាលបានបញ្ជាក់ថា នៅមុនពេលកើតហេតុ ក្មេងទាំង២នាក់ បានជិៈកង់ឌុបគ្នាក្នុងទិសដៅពីកើតទៅលិច ស្របពេលនោះមានរថយន្តខាងលើបានបើកក្នុងទិសដៅស្របគ្នាក្នុងល្បឿនលឿន ដល់កន្លែងកើតហេតុ ត្រង់ចំណុចគីឡូម៉ែត្រលេខ៤៣-៤៤ ស្ថិតនៅភូមិសង្កែ ឃុំបឹងបេង ក៏បានបុកកង់ពីក្រោយពេញទំហឹង បណ្តាលឲ្យមានអ្នកស្លាប់និងរបួស។បន្ទាប់មក រថយន្តបានរេចង្កូតធ្លាក់ពីថ្នល់ហើយអ្នកបើកបរ បានរត់គេចខ្លួនបន្សល់ទុកតែរថយន្តនៅកន្លែងកើតហេតុ។
ក្រោយកើតហេតុកម្លាំងនគរបាលជំនាញបានចុះដល់កន្លែងកើតហេតុ ធ្វើការត្រួតពិនិត្យវាស់វែងរួច បានប្រគល់សពជូនក្រុមគ្រួសារ ឯអ្នករបួសដឹកទៅសង្រ្គោះនៅមន្ទីរពេទ្យ។ ចំណែកវត្ថុតាង បានយកមករក្សាទុកនៅអធិការដ្ឋាន នគរបាលស្រុករង់ចាំធ្វើការដោះស្រាយតាមនីតិវធីច្បាប់៕ដោយ៖វណ្ណា