សារព័ត៌មាន នគរវត្ត តែងតែនាំមុខគេជានិច្ច
ទីក្រុងវៀងចន្ទ ៖ យោងតាមការចេញផ្សាយដោយ ទីភ្នាក់ងារព័ត៌មានចិនស៊ីនហួរ នៅរសៀលថ្ងៃអង្គារ ទី១៩ ខែឧសភា ឆ្នាំ២០២០នេះថា ខណៈវិធានការរឹតត្បិតប្រឆាំង COVID-19 ត្រូវបានបន្ធូរបន្ថយ រដ្ឋាភិបាលឡាវបានប្រកាសថា សិស្សទាំងអស់ទូទាំងប្រទេស អាចត្រឡប់ទៅសាលារៀនវិញបាន នៅថ្ងៃទី០២ ខែមិថុនា ខណៈថ្នាក់សិក្សាឆ្នាំចុងក្រោយ សម្រាប់ថ្នាក់បឋម, អនុ និងវិទ្យាល័យ បានចាប់ផ្ដើមចូលរៀនកាលពីថ្ងៃចន្ទម្សិលមិញ ។
តាមសេក្ដីប្រកាសចេញផ្សាយដោយ ការិយាល័យនាយករដ្ឋមន្ត្រីឡាវ កាលពីពេលថ្មីៗនេះ គ្រឹះស្ថានសិក្សាទាំងរដ្ឋ និងឯកជន ចាប់ពីថ្នាក់មតេយ្យរហូតដល់ថ្នាក់ឧត្ដមសិក្សា អាចនឹងបើកទ្វារឡើងវិញនៅថ្ងៃទី០២ ខែមិថុនាក្រោមការអនុវត្តវិធានការរឹតត្បិតមួយចំនួន។ ចំណែកឯថ្នាក់បឋមសិក្សាមួយចំនួនធំ ព្រមទាំងអនុវិទ្យាល័យ និងវិទ្យាល័យ បានបើកទ្វារឡើងវិញហើយកាលពីថ្ងៃចន្ទ សម្រាប់សិស្សដែលត្រៀមខ្លួនប្រឡងចូលថ្នាក់ ឧត្តមសិក្សានៅតាមសាកលវិទ្យាល័យនានា។
សូមជម្រាបថា ក្រសួងសុខាភិបាលឡាវបានប្រកាសពីការរកឃើញCOVID-19 ០២ករណីដំបូង កាលពីថ្ងៃទី២៤ ខែមីនា ហើយមកទល់ពេលនេះ ប្រទេសក្នុងតំបន់អាស៊ានមួយនេះមានអ្នកឆ្លង ១៩នាក់ និងជាសះស្បើយឡើងវិញ ១៤នាក់។ ឡាវត្រូវបានចាត់ទុកជាប្រទេសដែលមានករណីឆ្លង COVID-19 ទាបជាងគេបំផុត ប្រចាំប្រទេសអាស៊ានទាំង ១០៕ដោយ៖ស តារា
