សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម ៖ នារីពេញវ័យក្រមុំម្នាក់ អាចសង្ស័យថាមានវិបត្តិផ្លូវចិត្តហើយទើបដេីរតម្រង់មកលេីស្ពានកោះប៉ែនរួចលោតពីលេីស្ពានបំណងសម្លាប់ខ្លួន តែត្រូវបានសមត្ថកិច្ចដែលល្បាតបំពេញភារកិច្ចក្នុងមូលដ្ឋានឃេីញទាន់បានជួយអន្តរាគមន៍ដឹកនាំមកសង្គ្រោះនៅមន្ទីរពេទ្យ រួចអប់រំ ណែនាំថែមទាំងជួយជាថវិកាដេីម្បីរស់បន្តទៅមុខទៀត ។
ហេតុការណ៍នេះកេីតឡេីងកាលពីវេលាម៉ោង២២យប់ថ្ងៃទី២៤ ខែ ឧសភា ឆ្នាំ២០២០ ស្ថិតក្នុងភូមិព្រែកដើមចាន់ សង្កាត់សំបួរមាស ក្រុងកំពង់ចាម ខេត្តកំពង់ចាម ។
លោកវរសេនីយ៍ឯក អ៉ឹង ប៊ុន អធិការនគរបាលក្រុងកំពង់ចាមបានឱ្យដឹងថា ជាធម្មតាកម្លាំងសមត្ថកិច្ចរបស់លោកតែងតែបំពេញភារកិច្ចចុះល្បាតក្នុងភូមិសាស្ត្រក្រុងកំពង់ចាមជានិច្ច លុះនៅវេលាយប់ថ្ងៃកើតហេតុនេះពេលល្បាតមកដល់ចំណុចស្ពានកោះប៉ែន ស្ថិតក្នុងភូមិព្រែកដើមចាន់ សង្កាត់សំបួរមាស ក្រុងកំពង់ចាម ខេត្តកំពង់ចាម ពីដើមស្ពានខាងលិចចម្ងាយប្រហែល១00ម៉ែត្រ ស្រាប់តែឃើញមនុស្សស្រីម្នាក់លោតពីលើស្ពានកោះប៉ែន ។ ឃេីញដូច្នេះកម្លាំង សមត្ថកិច្ចបានដឹកមកសង្គ្រោះនៅមន្ទីរ ពេទ្យ ។
លោកវរសេនីយ៍ឯក អ៉ឹង ប៊ុន បន្តថា ករណីនេះលោកបានចុះផ្ទាល់ បញ្ជាឱ្យកម្លាំងល្បាតនៅគោលដៅនោះ សហការជាមួយកម្លាំងនគរបាលប៉ុស្តិ៍រដ្ឋបាលសំបួរមាស កម្លាំងប៉ុស្តិ៍រដ្ឋបាលវាលវង់ កម្លាំងប្រជាការពារ និងប្រជាពលរដ្ឋជួយ ធ្វើអន្តរាគមន៍សង្គ្រោះស្រង់អ្នករងគ្រោះ ហើយឱ្យបញ្ជូនជនរងគ្រោះ តាមរថយន្តរបស់អធិការដ្ឋានទៅសង្គ្រោះនៅមន្ទីរពេទ្យខេត្តកំពង់ចាមបានទាន់ពេលវេលា ។
លោកអធិការឱ្យដឹងទៀតថា អ្នករងគ្រោះឈ្មោះ ទ្រី សុខហេង អាយុ២១ឆ្នាំ ស្នាក់នៅបន្ទប់ជួលក្នុងភូមិទី២ សង្កាត់វាលវង់ ក្រុងកំពង់ចាម ខេត្តកំពង់ចាម។
ចំពោះមូលហេតុ លោកអធិការពុំទាន់ដឹងច្បាស់លាស់ ប៉ុន្តែលោកគ្រាន់តែដាក់ការ សង្ស័យថាអាចមានវិបត្តិផ្លូវចិត្តណាមួយមិនខាន ។ លោកថា នារីរងគ្រោះពុំទាន់និយាយកើត និងគ្មានសាច់ញាតិនៅក្បែរ(មានមិត្តភក្តិម្នាក់នៅមើលថែ)។ លោកអធិការបានជូនថវិកាមួយចំនួន ដើម្បីដោះស្រាយបន្ទុកខ្លះ និងកំពុងផ្សព្វផ្សាយរកសាច់ញាតិ ។
បច្ចុប្បន្ន ជនរងគ្រោះកំពុងសម្រាកព្យាបាលតាមដានជំងឺនៅមន្ទីរពេទ្យខេត្តកំពង់ចាម ៕ ដោយ ៖ វណ្ណៈ
