សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បេីកម៉ូតូលឿនជ្រុលទៅបុកម៉ូតូមួយគ្រឿងទៀតអូសជាង១០ម៉ែត្របណ្ដាលឱ្យបុរសម្នាក់រងរបួសធ្ងន់បែកក្បាលហូរឈាមស្រោចខ្លួន ត្រូវបានប្រជាពលរដ្ឋដឹកតាមម៉ូតូយកទៅព្យាបាលនៅមន្ទីរពេទ្យកាល់ម៉ែត។
ហេតុការណ៍គ្រោះថ្នាក់ចរាចរណ៍នេះបានកេីតឡេីងកាលពីវេលាម៉ោង៩និង២០នាទីយប់ ថ្ងៃទី២៥ខែឧសភាឆ្នាំ២០២០ នៅតាមបណ្ដោយផ្លូវលេខ១០៦កែងនឹងផ្លូវលេខ១៩ ស្ថិតក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ ។
ប្រភពព័ត៌មានពីប្រជាពលរដ្ឋដែលបានឃេីញហេតុការណ៍ឱ្យដឹងថា មុនពេលកេីតហេតុគេឃេីញបុរសរងគ្រោះជិះម៉ូតូហុងដាគុបសេ៩០ ពណ៌ទឹកប្រាក់ពាក់ស្លាកលេខភ្នំពេញ2W-2177 ធ្វើដំណើរតាមបណ្ដោយផ្លូវលេខ១៩ ក្នុងទិសដៅពីត្បូងទៅជេីង ខណៈមកដល់ចំណុចកេីតហេតុ ក៏មានម៉ូតូធំមួយគ្រឿងម៉ាកហុងដា CBR ពណ៌ស ពាក់ស្លាកលេខភ្នំពេញ1BS-6669 បេីកបរដោយុវជនម្នាក់ធ្វើដំណើរតាមផ្លូវលេខ១០៦ ក្នុងទិសដៅពីកេីតទៅលិចដោយប្រើល្បឿនយ៉ាងលឿន បានជ្រុលទៅបុកម៉ូតូគុបពេញទំហឹងអូសជាង១០ម៉ែត្រ បណ្ដាលឲ្យអ្នកបេីកម៉ូតូគុបរងរបួសធ្ងន់បែកក្បាលហូរឈាមស្រោចពេញខ្លួន ត្រូវបានបញ្ជូនទៅមន្ទីរពេទ្យកាល់ម៉ែតភ្លាមៗ ។ចំណែកអ្នកបេីកម៉ូតូធំមិនមានរងរបួសទេ គ្រាន់តែខូចខាតម៉ូតូខ្ទេចមួយកំណាត់មុខ រួចក៏ទាញទូរស័ព្ទមកនិយាយ។បន្តិចក្រោយមកក៏ឡើងជិះរថយន្តCRVពណ៌ស ពាក់ស្លាកលេខភ្នំពេញ2AN-0045 ចេញទៅបាត់។
បន្ទាប់ពីកេីតហេតុ សមត្ថកិច្ចមូលដ្ឋានបានមកដល់និងទំនាក់ទំនងទៅជំនាញចរាចរណ៍ខណ្ឌ ចុះមកវាស់វែងយកម៉ូតូទាំង២គ្រឿងទៅរក្សាទុកនៅការិយាល័យចរាចរណ៍ខណ្ឌដូនពេញ រង់ចាំភាគីទាំងពីរចូលខ្លួនមកដោះស្រាយនៅពេលក្រោយ ៕ ជ្រោយពេជ្រ
