សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ នៅថ្ងៃទី២៧ ខែឧសភាម្សិលមិញនេះ សារព័ត៌មានរបស់អាមេរិកABC News បានចេញផ្សាយដកស្រង់ប្រសាសន៍ លោក ដូណាល់ ត្រាំប្រធានាធិបតីអាមរិក បានគំរាមថា លោកនឹងព្យាយាមបិទបណ្តាញសង្គម Twitter ។បន្ទាប់ពីបណ្តាញសង្គមមួយនេះ បានដាក់សញ្ញាឲ្យអ្នកអានផ្ទៀងផ្ទាត់ការពិតនៅលើសារ Twitter ចំនួន២របស់លោក។
លោក ដូណាល់ ត្រាំ បាននិយាយតាមរយៈបណ្ដាញសង្គម Twitter ថា អ្នកសាធារណរដ្ឋ មានអារម្មណ៍ថា បណ្តាញសង្គមបំបិទសំឡេងអ្នកអភិរក្សនិយម។ លោកសង្កត់ធ្ងន់ថា៖ «យើងនឹងត្រួតពិនិត្យឲ្យបានតឹងរ៉ឹង ឬបិទបណ្តាញសង្គមTwitter តែម្តង មុននឹងបណ្តាញសង្គមទាំងអស់នោះអាចបំបិទសម្លេងបាន»។ លោក ក៏លើកឡើងផងដែរថា បណ្តាញសង្គមទាំងនោះព្យាយាម និងបរាជ័យម្តងហើយក្នុងនៅឆ្នាំ២០១៦ហើយលោកមិនបណ្តាលឲ្យកើតមានម្តងទៀតឡើយ។
ការមិនពេញចិត្តរបស់លោក ត្រាំ លើបណ្ដាញសង្គម កើនឡើងកាន់តែខ្លាំងក្រោយ Twitter បានដាក់សញ្ញាឲ្យត្រួតពិនិត្យការពិតលើសាររបស់លោកត្រាំ ។ សមាជិកព្រឹទ្ធសភាបក្សសាធារណរដ្ឋ លោកMarco Rubio បានលើកឡើងថា នៅពេលដែលTwitter សម្រេចដាក់ការត្រួតពិនិត្យលើបណ្តាញសង្គមដូចជាអ្នកបោះពុម្ព Twitter លែងរួចខ្លួនពីការទទួលខុសត្រូវហើយ និងត្រូវចាត់ទុកដូចជាអ្នកផ្សព្វផ្សាយដទៃដែលត្រូវនៅក្រោមច្បាប់។
សូមជម្រាបថា តាំងតែពីដើមមក លោក ត្រាំ បានចោទប្រកាន់ប្រព័ន្ធបណ្តាញសង្គមនានាថា ព្យាយាមបំបិទសំឡេងអ្នកអភិរក្សនិយម។ជាក់ស្តែងមុនបើកជំនួបជាមួយក្រុមហ៊ុនបណ្ដាញសង្គមនៅសេតវិមានឆ្នាំមុន លោកបានបង្ហោះសារ Twitter ថា ប្រធានបទនៃជំនួបគឺភាពមិនស្មោះត្រង់លម្អៀង រើសអើង និងគាបសង្កត់ ដែលធ្វើឡើងដោយក្រុមហ៊ុនខ្លះ។ លោកត្រាំ បានចោទ Facebook, Google និង Twitter ចំៗ ថាលម្អៀង និងបំបិទសំឡេងអ្នកគាំទ្ររូបលោក។
បច្ចុប្បន្នគេពុំទាន់ច្បាស់នៅឡើយថា លោកត្រាំអាចធ្វើចំណាត់ការលើក្រុមហ៊ុនបណ្តាញសង្គមនេះ បានយ៉ាងដូចម្តេចទេ ប៉ុន្តែក្នុងរយៈពេលចុងក្រោយនេះ ក្រុមហ៊ុនទាំងអស់នោះត្រូវបានស៊ើបអង្កេតដោយទីភ្នាក់ងាររដ្ឋ និងសហព័ន្ធ ក៏ដូចជាការសួរដេញដោលដោយសភាអាមេរិកផងដែរ។ប៉ុន្តែសេតវិមាន បញ្ជាក់ថា លោក ត្រាំ នឹងចេញបទបញ្ជាមួយទាក់ទងបណ្ដាញសង្គមនេះ។
តាមពិតទៅ Twitter បានផ្តល់សិទ្ធសេរីភាពឲ្យថ្នាក់ដឹកនាំពិភពលោកបង្ហោះសារ បើទោះបីជាសារទាំងអស់នោះមានព័ត៌មានក្លែងក្លាយក៏ដោយ។ គឺទើបតែនៅខែមិថុនាឆ្នាំ២០១៩ នេះទេ ដែលបណ្តាញសង្គមមួយនេះដាក់សញ្ញាព្រមានចំពោះសារទាំងឡាយណាដែរល្មើសនឹងវិន័យរបស់ខ្លួន និងជាសម្តីមិនអាចទទួលយកបាន។ ចំណែកក្នុងដើមខែឧសភានេះ Twitter បានសម្រេចដាក់សញ្ញាលើសារទាំងឡាយណាដែលអាចបង្កផលប៉ះពាល់ទាក់ទងនឹងព័ត៌មានពិតស្តីពីជំងឺ COVID-19 ៕
ដោយ៖ស តារា
