សារព័ត៌មាន នគរវត្ត តែងតែនាំមុខគេជានិច្ច
រឿងមួយមិនទាន់ឆ្លងផុតផងចូលដល់រឿងមួយទៀត អាមេរិកធ្លាក់ក្នុងវិបត្តិយ៉ាងពិតប្រាកដ
វិបត្តិកូវីដ-១៩ អាមេរិកមិនទាន់អាចគ្រប់គ្រងបានផង ក៏មានមហាបាតុកម្មក្លាយជាអំពើហិង្សា កើតឡើងនៅលើទឹកដីអាមេរិកចំពេលកំពុងឆ្លងរាលដាលកូវីដ-១៩ កាន់តែខ្លាំង។ នៅពេលនេះមានបាតុកម្មកើតឡើងនៅទីក្រុងជាង ២០ ក្នុងទឹកដីអាមេរិក ប្រឆាំងនិឹងការរើសអើងជាតិសាសន៍។ អាចនិយាយបានថាសង្គមអាមេរិក ស្ថិតនៅក្នុងដំណាក់កាលអាក្រក់បំផុតមិនធ្លាប់មាន។
វិវាទនៅខាងក្នុងមិនគ្រប់គ្រាន់ទេ ប្រធានាធិបតីអាមេរិក ដូណាល់ ត្រាំ បានបង្កឲ្យមានវិវាទកាន់តែខ្លាំងថែមទៀតពីខាងក្រៅ ដោយប្រទេសជាច្រើនថ្កោលទោសយ៉ាងខ្លាំងដល់ប្រធានាធិបតីដូណាល់ ត្រាំ ដែលប្រកាសឈប់ផ្តល់ជំនួយដល់អង្គការសុខភាពពិភពលោក និងដកអាមេរិកចេញពីអង្គការនេះ។
ពាក់ព័ន្ធនិឹងបាតុកម្មនៅលើទឹកដីអាមេរិក នៅពេលនេះមានមនុស្ស ៧នាក់រងការបាញ់ប្រហារនៅតំបន់ Louisville រដ្ឋKentucky ពេលកំពុងមានភាពចលាចល។ក្នុងចំណោមអ្នកត្រូវគ្រាប់កាំភ្លើងមានម្នាក់ស្ថិតក្នុងសភាពគ្រោះថ្នាក់។ នៅពេលនេះគេមិនទាន់ដឹងថាកាំភ្លើងបាញ់ចេញពីទីណានោះឡើយ។ ភាគីប៉ូលិសបានបញ្ជាក់ថា ប៉ូលិសទប់ស្កាត់បាតុកម្មទាំងអស់ដូច្នេះមិនមានអ្នកណាផ្ទុះអាវុធនោះឡើយ ។
សារព័ត៌មាន CNN បានផ្សាយថា មកទល់ពេលនេះ កម្លាំងសន្តិសុខទីក្រុង Houston រដ្ឋតិចសាស់ អាមេរិកបានចាប់ខ្លួនបាតុករជាង ២០០នាក់ដែលបង្កអំពើហិង្សា។ តាមការលើកឡើងរបស់កម្លាំងប៉ូលិស បាតុករដែលបានចាប់ខ្លួននឹងត្រូវចោទប្រកាន់ទោសពីបទបំផ្លាញសន្តិសុខសណ្តាប់ធ្នាប់ក្នុងសង្គម។ ប៉ុលិស៤នាក់រងរបួសក្នុងពេលប៉ះទង្គិចជាមួយក្រុមបាតុករ។ ក្រៅពីនេះរថយន្តប៉ូលិស៨គឿង រងការបំផ្លាញពីក្រុមបាតុករផងដែរ។
នៅទីក្រុងMinneapolis ក៏មានបាតុករ៥០នាក់ត្រូវបានចាប់ខ្លួនផងដែរ ។ ក្នុងរយៈពេល៣ថ្ងៃផ្ទុះបាតុកម្ម ហាងលក់ទំនិញ ផ្សារទំនើបដល់ទៅ១៧០កន្លែងរងការបំផ្លាញ បាតុករចូលយកអីវ៉ាន់ក្នុងផ្សារទាំងយប់។
បាតុកម្មនៅតែបន្តកើនឡើងពីមួយថ្ងៃទៅមួយថ្ងៃ មិនដឹងថាពេលណានឹងបញ្ចប់នោះឡើយ។នៅពេលនេះ អាមេរិកបានត្រៀមកម្លាំងទាហានដើម្បីទប់ទល់និឹងស្ថានភាពហិង្សាបង្កឡើងដោយក្រុមបាតុករ ។ ក្រុមអ្នកជំនាញបានលើកឡើងថា បាតុកម្មបែបនេះអាចធ្វើឲ្យអ្នកឆ្លងកូវីដ-១៩នៅអាមេរិក កាន់តែកើនឡើងខ្ពស់ថែមទៀត ខណៈដែលវ៉ាក់សាំងការពារនៅមិនទាន់ផលិតបាននៅឡើយ។
មួយវិញទៀតអាមេរិកដកខ្លួនចេញពីអង្គការWHO ធ្វើឱ្យប៉ះពាល់យ៉ាងខ្លាំងដល់សកម្មភាពផលិតថ្នាំព្យាបាលកូវីដ-១៩។ សហគមន៍អន្តរជាតិបានថ្កោលទោសយ៉ាងខ្លាំង ដល់សកម្មភាពរបស់ប្រធានាធិបតីអាមេរិក ក្នុងពេលដែល WHO កំពុងខិតខំជួយមនុស្ស ប្រឆាំងការឆ្លងកូវីដ-១៩៕ដោយ៖ធី រីណា
