សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ២នាក់បានធ្វេីសកម្មភាពវាយប្លន់យកម៉ូតូពីបុរសអ្នករត់ម៉ូតូឌុបម្នាក់បានសម្រេចកាលពី ល្ងាចថ្ងៃទី០៦ ខែឧសភា ឆ្នាំ២០២០ នៅចំណុច វាលស្រែ ផ្លូវលំ ភូមិអង្គរជ័យ សង្កាត់ស្នោរ ខណ្ឌកំបូល រាជធានីភ្នំពេញ។ ហេីយព្យាយាមគេចខ្លួនបាត់អស់រហូតមកដល់វេលាម៉ោង៥និង១០នាទី ល្ងាចថ្ងៃទី២៩ ខែឧសភា ឆ្នាំ២០២០ កម្លាំងនៃអធិការដ្ឋាននគរបាលខណ្ឌកំបូល ស្រាវជ្រាវរហូតឈានទៅដល់ការបង្រ្កាប ឃាត់ខ្លួនជនសង្ស័យជាបក្ខពួកចំនួន២នាក់ ជាបន្តបន្ទាប់។
ជនសង្ស័យទី១. ឈ្មោះ ធឹម សិទ្ធិ ភេទប្រុស អាយុ១៨ឆ្នាំ មុខរបរកម្មកររោងចក្រ ស្នាក់នៅ ភូមិទួលលៀប សង្កាត់ស្នោរ ខណ្ឌកំបូល ។
ទី២. ឈ្មោះ ម៉េង សំរិទ្ធ ភេទប្រុស អាយុ២៧ឆ្នាំ មុខរបរមិនពិតប្រាកដ ស្នាក់នៅបន្ទប់ជួលភូមិពង្រ សង្កាត់ចោមចៅទី៣ ខណ្ឌពោធិ៍សែនជ័យ ។
ចំណែកជនរងគ្រោះឈ្មោះលឹម អ៊ុយ កុក ភេទប្រុសអាយុ៥៨ឆ្នាំ មុខរបររត់ម៉ូតូឌុប។ ម៉ូតូដែលជនសង្ស័យវាយប្លន់នោះម៉ាកហុងដាឌ្រីមសង់ ស៊េរីឆ្នាំ២០១៩ ពណ៌ខ្មៅ ពាក់ស្លាកលេខភ្នំពេញ1HA 1078 ។
តាមសមត្ថកិច្ចបានឱ្យដឹងថា កាលពី ថ្ងៃទី០៦ ខែ ឧសភា ឆ្នាំ២០២០ នៅចំណុចវាលស្រែ ផ្លូវលំ ភូមិអង្គរជ័យ សង្កាត់ស្នោរ ខណ្ឌកំបូល មានជនសង្ស័យ២នាក់បានធ្វេីសកម្មភាពវាយប្លន់យកម៉ូតូហុងដាពីបុរសអ្នករត់ម៉ូតូឌុបម្នាក់បានសម្រេចហេីយនាំគ្នាគេចបាត់អស់។
ក្រោយពីទទួលពាក្យបណ្តឹងពីជនរងគ្រោះហេីយសមត្ថកិច្ចបានធ្វេីការស្រាវជ្រាវរហូតកំណត់មុខសញ្ញាបាន និងឈានទៅធ្វេីការឃាត់ខ្លួនជនសង្ស័យម្នាក់នៅក្នុងភូមិទួលលាភ សង្កាត់ស្នោរ ខណ្ឌកំបូល នៅថ្ងៃទី២៩ ខែឧសភា ហេីយបានយកមកសួរនាំ។
សមត្ថកិច្ចបានបន្តថា ក្រោយពីសួរនាំរួចជនសង្ស័យបានសារភាពថា ខ្លួនពិតជាបានធ្វេីសកម្មភាពប្លន់ម៉ូតូជនរងគ្រោះពិតប្រាកដមែនដោយហៅជនរងគ្រោះឱ្យឌុបតាំងពីរង្វង់មូលចោមចៅ រហូតមកដល់កន្លែងកេីតហេតុជាកន្លែងស្ងាត់ក៏វាយប្លន់យកម៉ូតូតែម្តង។
បន្ទាប់ពីសួរនាំរួច ក៏នាំជនសង្ស័យទៅតាមចាប់បក្ខពួកបានម្នាក់ទៀតកាលពីថ្ងៃទី៣០ ខែឧសភា នៅកន្លែងលក់ទឹកត្នោតជូ សង្កាត់ចោមចៅទី១ ខណ្ឌពោធិ៍សែនជ័យ។ ជនសង្ស័យទាំង២នាក់ធ្លាប់ធ្វេីសកម្មភាពវាយប្លន់ម៉ូតូប្រជាពលរដ្ឋតាមដងផ្លវជាញឹកញាប់។
បច្ចុប្បន្នកម្លាំងជំនាញនៃអធិការដ្ឋាននគរបាលខណ្ឌកំបូល បានកសាងសំណុំរឿងបញ្ជូនទៅកាន់សាលាដំបូងរាជធានី ដេីម្បីចាត់ការទៅតាមនីតិវិធីច្បាប់៕ដោយ ៖សុខាសែនជ័យ
