សារព័ត៌មាន នគរវត្ត តែងតែនាំមុខគេជានិច្ច
ក្រុមម្ចាស់ជើងឯកបារាំង Paris St-Germain (PSG) បានចុះហត្ថលេខាលើខ្សែប្រយុទ្ធ Mauro Icardi ក្នុងតម្លៃ៦០លានអឺរ៉ូ (៥៤លានផោន) ពីក្លឹប Inter Milan ជាផ្លូវការ។
កីឡាករសញ្ជាតិអាហ្សង់ទីនវ័យ២៧ឆ្នាំរូបនេះបានចូលរួមជាមួយ PSG កាលពីខែកញ្ញាក្នុងលក្ខខណ្ឌខ្ចីជើងរយៈពេលមួយរដូវពីក្លឹបអុីតាលី Inter Milan ។ កិច្ចព្រមព្រៀងថ្មីនេះមានន័យថា គាត់នឹងនៅបារាំងរហូតដល់ខែមិថុនាឆ្នាំ២០២៤ ។
Icardi រកបាន២០គ្រាប់ក្នុង៣១ប្រកួតគ្រប់ការប្រកួតមុនពេលរដូវកាលបារាំងត្រូវបានបញ្ចប់មុនរដូវកាលជាផ្លូវការនៅថ្ងៃទី៣០ ខែមេសាដោយនៅសល់១០ប្រកួតទៀតដោយសារតែជំងឺឆ្លងរាតត្បាតកូវីដ-១៩។
កីឡាកររូបនេះបានប្រជែងគ្នាដើម្បីដណ្តើមយកកៅអីជាមួយខ្សែប្រយុទ្ធអ៊ុយរ៉ាហ្គាយ Edinson Cavani ដែលជាអ្នករកគ្រាប់បាល់បានច្រើនជាងគេរបស់ក្លឹប PSG ដោយកិច្ចសន្យារបស់ Cavani នឹងផុតកំណត់នៅថ្ងៃទី៣០ ខែមិថុនា។
សេចក្តីថ្លែងការណ៍របស់ក្លិន Inter Milan បានឲ្យដឹងថា “ក្លឹបបានប្រកាសពីការផ្ទេរ Mauro Icardi ទៅ Paris Saint-Germain ។ ខ្សែប្រយុទ្ធរូបនេះកើតនៅឆ្នាំ១៩៩៣ បានផ្លាស់ទៅក្លឹបបារាំងជាអចិន្ត្រៃយ៍ហើយ” ។
ក្លឹបបានបន្តថា “ក្លឹបសូមអរគុណដល់កីឡាកររូបនេះសម្រាប់រយៈពេល៦រដូវកាលដែលគាត់បានចំណាយជាមួយពួកយើងហើយសូមជូនពរឱ្យគាត់មានសុខភាពល្អបំផុតសម្រាប់អាជីពនាពេលអនាគតរបស់គាត់” ៕ដោយ៖ភារៈ
