សារព័ត៌មាន នគរវត្ត តែងតែនាំមុខគេជានិច្ច
ក្រុមឧទ្ទាម Boko Haram បានបាញ់សម្លាប់ពលរដ្ឋដល់ទៅ៦៩ នាក់និងបំផ្លាញភូមិមួយទាំងមូល ក្នុងរដ្ឋ Borno ប្រទេសនីហ្សេរីយ៉ា។
ការបាញ់ប្រហារខាងលើកើតឡើង នៅថ្ងៃត្រង់ថ្ងៃទី៩ ខែមិថុនា ក្រោយពេលក្រុមបូកូហារ៉ាម ជិះមូតូជាច្រើនគ្រឿង ប្រដាប់ដោយកាំភ្លើង AK-47 ចូលទៅកាន់ភូមិ Faduma Koloram រដ្ឋ Borno ហើយបាញ់ប្រហារទៅលើពលរដ្ឋយ៉ាងព្រៃផ្សៃបំផុត។ ក្រោយការបាញ់ប្រហារក្រុមជនទាំងនោះក៏បានយកសត្វចិញ្ចឹម១២០០ ក្បាល ក្នុងនោះមានទាំងសត្វគោនិងសត្វអូដ្ឋ។
ការវាយប្រហារខាងលើកើតឡើង ដោយក្រុម Boko Haram ដែលពួកគេសង្ស័យថា អ្នកភូមិFaduma Koloram បានផ្តល់ព័ត៌មានដល់កម្លាំងសន្តិសុខ ពីកន្លែងស្នាក់នៅរបស់ក្រុមនេះ។
សារព័ត៌មាន AFP នៅថ្ងៃទី១០ ខែមិថុនា បានផ្សាយថា ក្រុមឧទ្ទាម Boko Haram វាយប្រហារ ដោយសារតែពលរដ្ឋនៅក្នុងភូមិ គ្មានការប្រុងប្រយ័ត្ន ។ ក្រុមនេះបានធ្វើសកម្មភាពក្នុងប្រទេសនីហ្សេរីយ៉ា អស់រយៈពេលជាង១ទសវត្សរ៍កន្លងមកហើយដោយបានសម្លាប់មនុស្ស ២៧ ០០០ នាក់ និងពលរដ្ឋ២លាននាក់ត្រូវភៀសខ្លួនចេញពីផ្ទះសម្បែង ៕ដោយ៖ធី រីណា
