សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យចំនួន៣នាក់ ជាមុខសញ្ញាឆក់ទ្រព្យសម្បត្តិប្រជាពលរដ្ឋយ៉ាងសកម្មក្នុងខណ្ឌពោធិ៍សែនជ័យ បានធ្វេីសកម្មភាពឆក់កាបូបពីស្ត្រីម្នាក់បានសម្រេច ខណៈដែលកំពុងធ្វេីដំណេីរតាមផ្លូវ ហេីយព្យាយាមរត់គេចខ្លួនតែត្រូវបានប្រជាពលរដ្ឋដេញចាប់បានម្នាក់កាលពីថ្ងៃទី១១ខែមិថុនា ឆ្នាំ២០២០ នៅក្នុងបុរីញ៉ូហូម ភូមិត្រពាំងថ្លឹង១ សង្កាត់ចោមចៅ១ ខណ្ឌពោធិសែនជ័យ រួចប្រគល់ជូនសមត្ថកិច្ចនាំយកទៅសាកសួររកបក្ខពួក ។លុះមកដល់វេលាម៉ោង១១និង៥០នាទីព្រឹក ថ្ងៃទី១២ ខែមិថុនា ឆ្នាំ២០២០នេះ កម្លាំងសមត្ថកិច្ចជំនាញបន្តស្រាវជ្រាវរហូតឈានដល់ការឃាត់ខ្លួនបក្ខពួកបានចំនួន២នាក់បន្ថែមទៀត ស្ថិតនៅភូមិថ្មគោលទី១ សង្កាត់ចោមចៅទី២ ខណ្ឌពោធិ៍សែនជ័យ។
ជនសង្ស័យទាំង៣នាក់នេះទី១ឈ្មោះ ឆុន ថាវុធ ភេទប្រុស មុខរបរជាង ស្នាក់នៅភូមិត្រពាំងថ្លឹងទី៣ សង្កាត់ចោមចៅទី១ ខណ្ឌពោធិ៍សែនជ័យ(ឃាត់ខ្លួនកាលពីថ្ងៃទី១១.០៦.២០២០) ។ ទី២ឈ្មោះ ដុះ ម៉េងហៀង ភេទប្រុស ស្នាក់នៅ ភូមិថ្មគោល សង្កាត់ចោមចៅទី២ ខណ្ឌពោធិ៍សែនជ័យ និងទី៣ឈ្មោះ ហង្ស លីហៀង ហៅ អាឌាំង ភេទប្រុសស្នាក់នៅ ភូមិថ្មគោល សង្កាត់ចោមចៅទី២ ខណ្ឌពោធិ៍សែនជ័យ (ឃាត់ខ្លួនថ្ងៃទី១២ ខែមិថុនា ឆ្នាំ២០២០)។
ចំណែកជនរងគ្រោះឈ្មោះ សន សុផា ភេទស្រី កម្មកររោងចក្រ ស្នាក់នៅភូមិត្រពាំងថ្លឹងទី២ សង្កាត់ចោមចៅទី១ ខណ្ឌពោធិ៍សែនជ័យ ។
សូមបញ្ជាក់ថា កាលពីវេលាម៉ោង១រសៀលថ្ងៃទី១១ ខែមិថុនា ឆ្នាំ២០២០ នៅចំណុចក្នុងបុរីញ៉ូហូម ភូមិត្រពាំងថ្លឹង១ សង្កាត់ចោមចៅ១ ខណ្ឌពោធិសែនជ័យ ជនសង្ស័យមានគ្នា៣នាក់ ជិះម៉ូតូមួយគ្រឿងម៉ាកBeat ពណ៌ខៀវបានធ្វើសកម្មភាពឆក់កាបូបលុយពីស្ត្រីរងគ្រោះកំពុងជិះកង់ នៅក្នុងបុរីញ៉ូហូម ។ ពេលបានសម្រេចហើយ ត្រូវជនរងគ្រោះស្រែកផ្អើលឆោឡោផ្អើលដល់ប្រជាពលរដ្ឋនាំគ្នា ជួយចាប់ទាញជនសង្ស័យបានម្នាក់ ធ្លាក់ពីលើម៉ូតូរួមទាំងយកកាបូបលុយបានមកវិញ ចំណែក២នាក់ទៀត បើកម៉ូតូគេចខ្លួនបាត់ ។
មន្រ្តីដដែលបន្តថា ក្រោយឃាត់ខ្លួនបានជនសង្ស័យទី១ឈ្មោះ ឆុន ថាវុធ រួចក៏នាំខ្លួនយកមកសាកសួរ ។ លុះមកដល់វេលាម៉ោង ១១និង៥០នាទីព្រឹកថ្ងៃទី១២ ខែមិថុនា ឆ្នាំ២០២០នេះ កម្លាំងសមត្ថកិច្ចស្រាវជ្រាវឃាត់ខ្លួនបានបក្ខពួកចំនួន២នាក់បន្ថែមទៀត ស្ថិតនៅភូមិថ្មគោលទី១ សង្កាត់ចោមចៅទី២ ខណ្ឌពោធិ៍សែនជ័យតែម្តង ។
បច្ចប្បន្នជនសង្ស័យទាំង៣នាក់កំពុងឃាត់ខ្លួនបណ្ដោះអាសន្ននៅអធិការខណ្ឌដេីម្បីកសាងសំណុំរឿងបញ្ជូនទៅកាន់តុលាការចាត់ការតាមផ្លូវច្បាប់ ៕ដោយ៖ សុខាសែនជ័យ
