សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ព្រលានយន្ដហោះអន្ដរជាតិអង្គរ ដែលបាននិងកំពុងសាងសង់នៅក្នុងស្រុកសូទ្រនិគម ខេត្តសៀមរាប នឹងសាងសង់រួចរាល់ក្នុងឆ្នាំ២០២៣ ដោយពុំមានការពន្យារពេល ក្នុងអំឡុងវិបត្តិជាសកលនៃជំងឺកូវីដ-១៩ឡើយ នេះបើតាមការបញ្ជាក់ របស់ លោកជា អូន រដ្ឋលេខាធិការដ្ឋានអាកាសចរស៊ីវិល ក្នុងឱកាសលោកចុះពិនិត្យការដ្ឋានសាងសង់ កាលពីថ្ងៃទី១៥ ខែមិថុនា ឆ្នាំ២០២០នេះ។
តាមការរយៈជំនួបរវាងប្រតិភូអាកាសចរស៊ីវិលកម្ពុជា និងក្រុមការងារជំនាញក្នុងការដ្ឋានសាងសង់ បង្ហាញថា កម្លាំងកម្មករ រួម និងអ្នកជំនាញ មានជួបការលំបាកមួយចំនួនផងដែរ ក្នុងពេលបំពេញការងារ ដោយចាំបាច់ត្រូវ គោរពតាមសេចក្ដីណែនាំរបស់ក្រសួងសុខាភិបាល ដើម្បីបង្ការ ការពារ នៃការឆ្លងរីករាលដាលនៃជំងឺកូវីដ-១៩។ ប៉ុន្តែបញ្ហានេះ ពុំប៉ះពាល់ធ្ងន់ធ្ងរដល់ការងារសាងសង់ឡើយ បច្ចុប្បន្ន កម្លាំងកម្មករ កំពុងធ្វើការចាក់គ្រឺះសំណង់ ដែលនឹងរួចរាល់នៅខែសីហាខាងមុខនេះ។
លោក រដ្ឋលេខាធិការ បញ្ជាក់ថា ព្រលានយន្ដហោះអន្ដរជាតិថ្មីនេះ ដំណើរការសាងសង់បាន២០ភាគរយហើយ លើផ្ទៃដី ៧០០ហិកតា។ សំណង់នេះដែរ នឹងសាងសាង់តាមរចនាបថខ្មែរ ដោយប្រើកម្លាំងកម្មករសរុប ប្រមាណ៦០០នាក់ និងប្រើថវិការសាងសង់ជិត១ពាន់លានដុល្លារអាមេរិក។
គួររំលឹកថា នៅក្នុងសន្និសីទសារព័ត៌មានស្ដីពីវឌ្ឍនភាព និងទិសដៅការងារបន្ត របស់រដ្ឋបាលខេត្តសៀមរាប កាលពីថ្ងៃទី០២ ខែមិថុនា ឆ្នាំ២០២០ នៅទីស្តីការគណៈរដ្ឋមន្ត្រី លោក លី សំរិទ្ធ អភិបាលរងខេត្ត រំពឹងថា បន្ទាប់ពីព្រលានយន្ដហោះអន្ដរជាតិថ្មីនេះ សាងសង់រួចរាល់ វានឹងអាចទទួលយន្តហោះធុនធំគ្រប់ប្រភេទ ក្នុងនោះខេត្តនឹងអាចទទួលបានអ្នកទេសចរអន្តរជាតិប្រមាណ ៩លាននាក់៕ដោយ៖ហេង សូរិយា
