សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ភាពយន្តជីវិតរឿង”ប្តីទីងមោង” បានធ្វើឲ្យអ្នកទស្សនារំជួលចិត្តអាណិតតួអង្គប្តីដែលជួបនៅរឿងរ៉ាវស្នេហាផិតក្បត់របស់ភរិយា។ តាមការពិតតួឯកប្រុសក្នុងភាពយន្តនេះមានឈ្មោះ មិ ភារាន់ គឺជាអ្នកថតវីដេអូ ហើយក៏ជាអ្នកចម្រៀងម្នាក់ផងដែរ។
ភាពយន្តអប់រំរបស់ផលិតកម្ម មរតកមេឌៀ បានធ្វើឲ្យអ្នកគាំទ្រ ស្រក់ទឹកភ្នែកមិនតិចទេក្រោយបានទស្សនាភាពយន្តនេះចប់ និងបានសរសើរពីសមត្ថភាពសម្ដែងរបស់តារាសម្តែងក្នុងរឿងផងដែរ។ ក្នុងនោះតួឯកប្រុស លោក មិ ភារាន់ ក៏អាចទាញចិត្តទស្សនិកជនឲ្យចាប់អារម្មណ៍មិនតិចនោះទេ។
តាមការទម្លាយឲ្យដឹងពីអ្នកគ្រប់គ្រងទូទៅនៅផលិតកម្មនេះបានលើកឡើងថា តាមការពិត លោក មិ ភារាន់ គឺជាអ្នកថតវីដេអូ( Camera Man) និងជាអ្នកកាត់តក្នុងផលិតកម្មផ្ទាល់ដែលធ្លាប់សាងស្នាដៃជាច្រើននិងទទួលបានការកោតសរសើរខ្លាំងពីផលិតករ និងទស្សនិកជន ទើបការសម្តែងក្នុងភាពយន្តជីវិតនេះមិនមានបញ្ហាប្រឈមច្រើន។
លោកជាអ្នកស្រុកស្វាយរៀង ដែលមានទាំងទេពកោសល្យ សមត្ថភាពថត និងសម្តែងផ្ទាល់តែម្តង បើទោះបីជាការងារជាអ្នកសម្តែងលោកមិនសូវចេញមុខច្រើនក៏ដោយក៏លោកទទួលបានការពេញចិត្តច្រើនពីទស្សនិកជនក្រោយពីទស្សនាភាពយន្តខាងលើចប់។
ប្រភពបញ្ជាក់ដែរថា កន្លងមក លោក មិ ភារាន់ ក៏ធ្លាប់បានបង្ហើរសំនៀងយ៉ាងពិរោះក្នុងបទចម្រៀង២បទរបស់ផលិតកម្មដែរ គឺបទ “ស្មោះគេខ្លាំងទើបដឹងខ្លួនថោក” បទ”ឈប់ថោកជាមួយគេ” និងបទ”ប្តីទីងមោង”។
អ្នកជំនាញភាពយន្តមួយនេះគ្រោងនឹងបញ្ចេញស្នាដៃរបស់លោកមួយចំនួនទៀតដើម្បីបម្រើការកម្សាន្តរបស់អ្នកគាំទ្រផងដែរ៕ ដោយ វឌ្ឍនា
