សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ២នាក់ត្រូវកម្លាំងនគរបាលប៉ុស្តិ៍រដ្ឋបាលក្រាំងធ្នង់ឃាត់ខ្លួនបានជាបន្តបន្ទាប់ករណីឆក់យកទូរស័ព្ទដៃពីបុរសម្នាក់។
ហេតុការណ៍នេះកើតឡើងកាលពីវេលាម៉ោង២០និង៤០នាទី ថ្ងៃទី២២ ខែមិថុនា ឆ្នាំ២០២០ នៅតាមផ្លូវបេតុង ក្នុងភូមិត្រពាំងមាន សង្កាត់ក្រាំងធ្នង់ ខណ្ឌសែនសុខ។
សមត្ថកិច្ចប្រាប់ថា ជនសង្ស័យមាន ឈ្មោះ ខឿន រ៉ាវុធ ភេទប្រុស អាយុ២៧ឆ្នាំ ជនជាតិខ្មែរ មុខរបរគ្មាន ស្នាក់នៅសង្កាត់គោករកា ខណ្ឌព្រែកព្នៅ (មានសារធាតុញៀន) និងម្នាក់ទៀត ឈ្មោះ សុខ ភារិទ្ធ ហៅ មិក ភេទប្រុសអាយុ២០ឆ្នាំ មុខរបរមិនពិតប្រាកដ ស្នាក់នៅភូមិអណ្តូង៦ សង្កាត់គោករកាខណ្ឌព្រែកព្នៅ។
ចំណែកម្ចាស់ទូរស័ព្ទមាន ឈ្មោះ ភូ ភារិទ្ធ ភេទប្រុស អាយុ១៧ឆ្នាំ ជនជាតិខ្មែរ មុខរបរកម្មករសំណង់ ស្នាក់នៅក្នុងការដ្ឋានសំណង់ ភូមិត្រពាំងមាន សង្កាត់ ក្រាំងធ្នង់ ខណ្ឌសែនសុខ ។
នគរបាលប៉ុស្តិ៍រដ្ឋបាលក្រាំងធ្នង់បានឲ្យដឹងទៀតថា មុនពេលកើតហេតុជនរងគ្រោះបានជិះម៉ូតូតាមដងផ្លូវហើយដោយស្ថានភាពងងឹតគាត់បានយកទូរស័ព្ទដៃចុចបំភ្លឺផ្លូវ លុះមកដល់ចំណុចកើតហេតុស្រាប់តែលេចមុខជនសង្ស័យ២នាក់ជិះម៉ូតូម៉ូតូ១គ្រឿង ម៉ាកហុងដាសេ១១០ ពណ៌ខ្មៅ ពាក់ស្លាកលេខភ្នំពេញ-3320(អត់ចាំអក្សរខាងដើម) មកពីក្រោយហើយជនសង្ស័យម្នាក់ដែលជិះខាងក្រោយក៏ធ្វើសកម្មភាពឆក់យកទូរស័ព្ទដៃពីជនរងគ្រោះបានសម្រេចហើយបើកម៉ូតូរត់គេចខ្លួន ពេលនោះសមត្ថកិច្ចបានឃាត់ខ្លួនជនសង្ស័យម្នាក់។ លុះព្រឹកឡើងថ្ងៃទី២៣ ខែមិថុនា ឆ្នាំ២០២០សមត្ថកិច្ចបានបន្តធ្វើការស្រាវជ្រាវទើបឃាត់ខ្លួនបានជនសង្ស័យម្នាក់ទៀត។
សម្ភារបាត់បង់ ទូរសព្ទ័ដៃ១គ្រឿង ម៉ាកVIVO ។ សម្ភារបន្សល់ទុក ម៉ូតូ១គ្រឿង ម៉ាកហុងដាសេ១១០ ពណ៌ខ្មៅជារបស់ជនសង្ស័យ។
បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមនីតិវិធី ៕ ដោយ៖ ចន្ទ លីហ្សា
