សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តមិនស្គាល់ម៉ាកមួយគ្រឿង បានបេីកបុកម៉ូតូCPX មួយគ្រឿងទៀត បណ្ដាលឲ្យនារីរូបស្រស់ម្នាក់ស្លាប់យ៉ាងអាណោចអាធ័ម និងបុរសម្នាក់ជាសង្សាររងរបួសធ្ងន់ រួចបេីករថយន្តគេចបាត់ភ្លាមៗ ដោយបង្កការភ្ញាក់ផ្អេីលដល់ប្រជាពលរដ្ឋកាលពីវេលាម៉ោង១រំលងអាធ្រាត្រ ឈានចូលថ្ងៃទី២៧ ខែមិថុនា ឆ្នាំ២០២០ ស្ថិតនៅតាមបណ្ដោយផ្លូវ១៤៣ កែងផ្លូវ៣១០ ក្នុងសង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ ។
សពនារីជនរងគ្រោះ មានឈ្មោះ គ្រី សុដាឡែន អាយុ១៨ឆ្នាំ រៀនថ្នាក់១២ នៅវិទ្យាល័យទួលទំពូង ស្នាក់នៅក្នុងសង្កាត់បឹងសាឡាង ខណ្ឌទួលគោក និងមានស្រុកកំណើតនៅឯខេត្តបាត់ដំបង ។ រីឯបុរសដែលរបួសធ្ងន់មិនស្គាល់អត្តសញ្ញាណនោះទេ ដោយអ្នកទាំង២បានធ្វេីដំណេីររួមគ្នាជិះម៉ូតូមួយគ្រឿងម៉ាកPCX ពណ៌ស ពាក់ស្លាកលេខ ព្រះសីហនុ 1I -7873 ។
យោងតាមសាក្សីពីប្រជាពលរដ្ឋដែលឃេីញហេតុការណ៍ខាងលេីបានឲ្យដឹងថា មុនកេីតហេតុគេឃេីញម៉ូតូមួយគ្រឿងម៉ាក PCX ពណ៌ស ធ្វេីដំណេីរដោយបុរសម្នាក់ និងនារីម្នាក់ តាមបណ្ដោយផ្លូវ៣១០ ទិសដៅពីកេីតទៅលិច ខណៈមកដល់ចំណុចកេីតហេតុស្រាប់តែមានរថយន្តមួយគ្រឿងមិនចាំម៉ាក គ្រាន់តែដឹងថាពណ៌ខ្មៅ បានធ្វេីដំណេីរតាមបណ្ដោយផ្លូវ១៤៣ ទិសដៅពីជេីងទៅត្បូង ក្នុងល្បឿនយ៉ាងលឿន ហេីយក៏បុកម៉ូតូចំពីចំហៀងពេញទំហឹង បណ្ដាលឲ្យម៉ូតូអូសជាង៥០ម៉ែត្រ និងធ្វេីឲ្យបុរសម្នាក់ជាអ្នកឌុបរងរបួសធ្ងន់ និងនារីម្នាក់រួមដំណេីរជាមួយគ្នាបានស្លាប់យ៉ាងអាណោចអាធ័ម ។
ក្រោយកេីតហេតុភ្លាមៗ រថយន្តបង្កបានព្យាយាមបេីកគេចខ្លួនបាត់ស្រមោលតែម្ដង ។ រីឯបុរសរងរគ្រោះដែលរបួសធ្ងន់បានប្រាប់អ្នកព័ត៌មានបន្តិចថា នារីរងគ្រោះគឺជាសង្សារ រួចក៏ឡេីងរថយន្តសាមុយទៅសង្គ្រោះតែម្ដង ។
បន្ទាប់មក សមត្ថកិច្ចមូលដ្ឋាននិងជំនាញចរាចរណ៍ខណ្ឌបានចុះមកដល់ ហេីយធ្វេីការវាស់វែងយកម៉ូតូជនរងគ្រោះទៅរក្សាទុក និងធ្វេីកំណត់ហេតុប្រគល់សពឲ្យទៅក្រុមគ្រួសារយកទៅបុណ្យតាមប្រពៃណី៕ ដោយ៖ ភារ៉ា ដង្កោ
