សារព័ត៌មាន នគរវត្ត តែងតែនាំមុខគេជានិច្ច
នៅថ្ងៃទី២៩ ខែមិថុនា ចិនបានប្រកាសផ្អាកផ្តល់ទិដ្ឋាការដល់មន្ត្រី ពលរដ្ឋអាមេរិកដែលបានជ្រៀតជ្រែកចូលកិច្ចការផ្ទៃក្នុងរបស់ចិន គឺហុងកុង។ ជាមួយគ្នានេះដែរ រដ្ឋាភិបាលហុងកុងបានអនុវត្តច្បាប់សន្តិសុខថ្មីយ៉ាងពេញលេញ។
សារព័ត៌មាន China Daily បានផ្សាយថា «ចិនបានសម្រេចកាត់បន្ថយការផ្តល់ទិដ្ឋាការចំពោះបុគ្គល មន្ត្រីអាមេរិកដែលមានសកម្មភាពមិនអាចទទួលយកបានពាក់ព័ន្ធនឹងកោះហុងកុង»។ អ្នកនាំពាក្យក្រសួងការបរទេសចិនបានបញ្ជាក់យ៉ាងច្បាស់ថា រាល់ការខិតខំរបស់អាមេរិកដើម្បីរារាំងច្បាប់សន្តិសុខថ្មីនៅហុងកុង គឺមិនអាចទទួលបានជោគជ័យឡើយ។
សកម្មភាពខាងលើរបស់ចិនក្រោយពេលដែលទីក្រុងវ៉ាស៊ីនតោនបានសម្រេចផ្អាកផ្តល់ទិដ្ឋាការដល់មន្ត្រីចិនដែលអាមេរិកចាត់ទុកថាបានរារាំងដល់លទ្ធិប្រជាធិបតេយ្យនៅកោះហុងកុង។ សកម្មភាពរបស់អាមេរិកត្រូវបានរដ្ឋាភិបាលទីក្រុងប៉េកាំងប្រឆាំងយ៉ាងខ្លាំង ហើយបញ្ជាក់ថានេះជាកិច្ចការផ្ទៃក្នុងរបស់ចិន។
កាលពីថ្ងៃទី២៨ ខែឧសភា សភាចិនបានអនុម័តទៅលើច្បាប់សន្តិសុខនៅលើកោះហុងកុង ដើម្បីរក្សាសន្តិសុខ សណ្តាប់ធ្នាប់យូរអង្វែងនៅលើកោះនេះ ។ ច្បាប់សន្តិសុខ មិនធ្វើឲ្យប៉ះពាល់ដល់ទម្រង់សេដ្ឋកិច្ចនយោបាយរបស់កោះហុងកុងនោះឡើយ គឺសំដៅទៅលើជនខិលខូចប្រព្រឹត្តល្មើសតែប៉ុណ្ណោះ៕
ដោយ៖ធី រីណា
