រថយន្តនិងម៉ូតូបុកគ្នាបណ្តាលឲ្យបុរស២នាក់របួសធ្ងន់

ភ្នំពេញ៖បុរសម្នាក់បើករថយន្តស៊េរីទំនើបជែងគេជ្រុលទៅបុកម៉ូតូមួយគ្រឿងចំពីមុខពេញទំហឹងបណ្តាលឲ្យបុរសពីរនាក់រងរបួសធ្ងន់។

ហេតុការណ៍នេះបានកើតឡើងកាលពីម៉ោង១២និង៣០នាទីរំលងអធ្រាត្រឈានចូលថ្ងៃទី៤ ខែកក្កដា ឆ្នាំ ២០២០ នៅតាមបណ្ដោយផ្លូវលេខ១៩៨ មុខយានដ្ឋាន(PAC) ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញបុរសម្នាក់បើករថយន្តម៉ាកហ្វដរ៉េនជ័រពណ៌សមួយគ្រឿងពាក់ស្លាកលេខភ្នំពេញ2AY-3178 រួមដំណើរជាមួយបុរសពីរនាក់ទៀតតាមបណ្ដោយផ្លូវលេខ១៩៨ ក្នុងទិសដៅពីលិចទៅកើត ខណៈមកដល់ចំណុចកើតហេតុបានបើកវ៉ាឡំប្រឺតាមួយគ្រឿងជ្រុលទៅបុកម៉ូតូម៉ាកហុងដាប៊ីតពណ៌សលាយខៀវ ពាក់ស្លាកលេខកំពង់ស្ពឺ 1Q-5185 ជិះដោយបុរសពីរនាក់ធ្វើដំណើរបញ្ច្រាសទិសគ្នាចំពីមុខពេញទំហឹងបណ្តាលឲ្យបុរសពីរនាក់រងរបួសធ្ងន់ ត្រូវបានរថយន្តសង្គ្រោះដឹកយកទៅសង្គ្រោះនៅឯមន្ទីរពេទ្យភ្លាមៗ។

បន្ទាប់ពីកើតហេតុសមត្ថកិច្ចមូលដ្ឋានបានចុះមកដល់ហើយបានទំនាក់ទំនងទៅសមត្ថកិច្ចជំនាញចុះមកវាស់វែងយកម៉ូតូ និងរថយន្តទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរង់ចាំដោះស្រាយគ្នានៅពេលក្រោយ៕ ជ្រោយពេជ្រ