សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖នារីម្នាក់បេីករថយន្តឆ្លងផ្លូវបុកម៉ូតូខ្ទាតជាង១០ម៉ែត្របណ្តាលឲ្យបុរស២នាក់រងរបួសធ្ងន់។
ហេតុការណ៍នេះបានកេីតឡេីងកាលពីម៉ោង១០និង១៥នាទីព្រឹក ថ្ងៃទី១០ ខែកក្កដាឆ្នាំ២០២០ នៅតាមបណ្តោយផ្លូវជាតិលេខ៦ ខាងមុខបុរីប៉េងហួត ក្នុងក្រុម១ភូមិព្រែកលៀប សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ។
សមត្ថកិច្ចបានឲ្យដឹងថារថយន្តម៉ាកហុងដាCRV ពណ៌ទឹកប្រាក់ពាក់ស្លាកលេខភ្នំពេញ2C 6478បេីកដោយនារីម្នាក់ឈ្មោះវីរ៉ា ធីតាណែត អាយុ២១ឆ្នាំ។
ចំណែកម៉ូតូម៉ាកហុងដាឌ្រីមពណ៌ខ្មៅពាក់ស្លាកលេខកំពង់ធំ1N 1579 បើកបរដោយឈ្មោះសៀង វ៉ាន់នី អាយុ២១ឆ្នាំ រួមដំណេីរដោយឈ្មោះហ័ន ចំរេីន អាយុ២០ឆ្នាំ ។
ប្រភពព័ត៌មានពីប្រជាពលរដ្ឋនៅកន្លែងកើតហេតុឲ្យដឹងថានៅពេលកើតហេតុម៉ូតូជិះឌុបគ្នាតាមបណ្តោយផ្លូវជាតិលេខ៦ ពីជើងទៅត្បូង ខណៈមកដល់ចំណុចកើតហេតុស្រាប់តែមានរថយន្តមួយគ្រឿងបើកដោយនារីម្នាក់ ក្នុងទិសដៅពីត្បូងទៅជើងបត់ចូលបុរីប៉េងហួតតែមិនទាន់បត់ផុតផ្លូវផងក៏ទៅបុកម៉ូតូដួលបណ្តាលឲ្យបុរស២នាក់រងរបួសធ្ងន់បាក់ជើង។
បន្ទាប់ពីកើតហេតុជនរងគ្រោះត្រូវបានបញ្ជូនទៅសង្គ្រោះនៅមន្ទីរពេទ្យកាល់ម៉ែត ចំណែកម៉ូតូនឹងរថយន្តត្រូវបានសមត្ថកិច្ចវាស់វែងយកទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរងចាំដោះស្រាយគ្នានៅពេលក្រោយ៕
ដោយ៖ជ្រោយពេជ្រ
