សារព័ត៌មាន នគរវត្ត តែងតែនាំមុខគេជានិច្ច
បរទេស៖ នៅថ្ងៃទី១០ ខែកក្កដារដ្ឋាភិបាលអាមេរិក បានអនុម័ត ថវិកា៦២០លានដុល្លារសម្រាប់អភិវឌ្ឍន៍កាំជ្រួចមីស៊ីលPatriotឲ្យកោះតៃវ៉ាន់ ដើម្បីទប់ទល់ជាមួយចិន។ សកម្មភាពខាងលើរបស់អាមេរិក នឹងធ្វើឲ្យទំនាក់ទំនងអាមេរិកនិងចិនកាន់តែតានតឹងថែមទៀត។
រដ្ឋាភិបាលទីក្រុងប៉េកាំង តែងតែចាត់ទុកកោះតៃវ៉ាន់ គឺជាផ្នែកមួយនៃទឹកដីចិនមិនអាចកាត់ផ្តាច់បានឡើយ។ ជាមួយគ្នានោះចិន បានប្រកាសព្រមានជាច្រើនលើកហើយ នឹងប្រើប្រាស់កម្លាំងដើម្បី បង្រួបបង្រួមប្រសិនបើកោះនេះហ៊ាន ប្រកាសឯករាជ្យពីចិន ដីគោកនោះ។
ចំណែកអាមេរិកវិញបានប្រើប្រាស់កោះតៃវ៉ាន់ ដើម្បី កាត់បន្ថយឥទ្ធិពលរបស់ចិន ដោយតែងតែ ជួយដល់ តៃវ៉ាន់ក្នុងការអភិវឌ្ឍន៍វិស័យការពារជាតិ និងអាវុធទំនើបៗជាច្រើន។ នៅពេលនេះអាមេរិក បានឆ្លើយតបតាមសំណើរបស់កោះតៃវ៉ាន់ក្នុងការអភីវឌ្ឍមីស៊ីលPatriot អាចប្រើប្រាស់បាន៣០ឆ្នាំខាងមុខទៀត ។ ក្រុមហ៊ុនLockheed Martin និងដើរតួនាទី ក្នុងការ អភិវឌ្ឍន៍ មីស៊ីលខាងលើ។
ក្រសួងការបរទេសអាមេរិក បានបញ្ជាក់ថា នេះជាលើកទី៧ហើយដែល រដ្ឋាភិបាល អាមេរិក បានលក់អាវុធ ឲ្យកោះតៃវ៉ាន់ ដើម្បីការពារសន្តិសុខ ស្ថិរភាពនៅតំបន់សមុទ្រនេះ ៕
ដោយ៖ធី រីណា
