ក្មួយស្រីលោកត្រាំចង់ឲ្យពូរបស់ខ្លួនលាលែងពីតំណែង

អាមេរិក៖ នាង Mary Trump ដែលជាក្មួយស្រីរបស់ប្រធានាធិបតី ដូណាល់ ត្រាំ បានប្រកាសថា ប្រសិនបើនាងបានចូលទៅកាន់សេតវិមាន ជួបជាមួយលោកពូត្រាំនោះ នាងនឹងស្នើឲ្យលោកពូលាលែងចេញពីតំណែងប្រធានាធិបតីអាមេរិក ។
ឆ្លើយតបទៅនឹងបទសម្ភាសន៍ជាមួយបណ្តាញព័ត៌មាន ABC លោកស្រីMary Trump បានលើកឡើងពីការទៅសួរសុខទុក្ខលោកពូ នៅសេតវិមានកាលពីឆ្នាំ​២០១៧ គឺក្រោយប៉ុន្មានខែដែល លោកត្រាំចូលកាន់តំណែងប្រធានាធិបតីអាមេរិក ។

លោកស្រី​Mary Trump បានលើកឡើងថា លោកពូរបស់នាងពិតជាតានតឹង​ខ្លាំងណាស់ដោយសារតែគំនាបពីមហាជន។
អ្នកស្រី​ Mary Trump បានលើកឡើងថា «ខ្ញុំគិតថា គាត់(ពូត្រាំ)ពិតជាហត់នឿយខ្លាំងណាស់ ដោយគាត់បានបង្ហាញចេញថានេះមិនមែនអ្វីដែលគាត់ចង់បានឡើយ»។

អ្នកដឹកនាំកម្មវិធីGeorge Stephanopoulos បានសួរនាងថា ប្រសិនបើចូលទៅកាន់សេតវិមាននាពេលនេះ ​អ្នកស្រី
នឹងនិយាយអ្វី? នាង​Mary Trump បានបញ្ជាក់ថា គឺស្នើឲ្យពូរបស់ខ្លួនលាលែងចេញពីតំណែងនៅពេលនេះ។
ការលើកឡើងខាងលើរបស់អ្នកស្រី Mary Trump គឺក្រោយពេលបានចេញផ្សាយសៀវភៅដែលមានចំណងជើងថា «គ្រួសារខ្ញុំបានបង្កើតមនុស្សដែលមានគ្រោះថ្នាក់បំផុតលើពិភពលោកបែបណា?» នៅក្នុងសៀវភៅនោះ អ្នកស្រី Mary Trump បានរិះគន់យ៉ាងខ្លាំងដល់លោកពូរបស់នាង​ និងរឿងរ៉ាវជាច្រើនពាក់ព័ន្ធនឹងគ្រួសារ ក្នុងនោះមានទាំងការបន្លំពេលប្រឡង ដោយឲ្យមនុស្សផ្សេងប្រឡងជំនួសទៀតផង​៕ដោយ៖ធី រីណា