សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ មជ្ឈមណ្ឌលគ្រប់គ្រង និងបង្ការជំងឺឆ្លងកូរ៉េខាងត្បូង (KCDC) បានប្រកាសនៅថ្ងៃទី២៥ខែកក្កដានេះថា ក្នុងរយៈពេល២៤ម៉ោងកន្លងមក មានករណីឆ្លងកូវីដ-១៩ ដល់ទៅ១១៣នាក់ គឺជាចំនួនច្រើនបំផុតមិនធ្លាប់មានចាប់តាំងពីខែមីនាមកទល់ពេលនេះ។
តាមរបាយការណ៍ពីក្រសួងសុខាភិបាលកូរ៉េខាងត្បូងបានបញ្ជាក់ថា ក្នុងចំណោមអ្នកឆ្លងថ្មីទាំង ១១៣នាក់ មាន៨៦នាក់ចូលពីក្រៅប្រទេស និង២៧នាក់ឆ្លងនៅក្នុងសហគមន៍។ ភាគច្រើនអ្នកឆ្លងមកពីក្រៅគឺជាសមាជិកនៅលើនាវា១គ្រឿងរបស់រុស្ស៊ី និងកូរ៉េខាងត្បូងបានវិលត្រឡប់មកប្រទេសអុីរ៉ាក់វិញតាមជើងហោះហើរយោធា កាលពីចុងសប្តាហ៍កន្លងមក។
ក្នុងរយៈពេល១សប្តាហ៍កន្លងមក កូរ៉េខាងត្បូងបានបង្កើនសកម្មភាពទប់ស្កាត់ការឆ្លងរាលដាលកូវីដ-១៩ ហើយពលរដ្ឋមកពីក្រៅប្រទេសគឺត្រូវតែកាត់ផ្តាច់រយៈពេល១៤ថ្ងៃ ។ គិតមកដល់ពេលនេះ កូរ៉េខាងត្បូង មានអ្នកឆ្លងកូវីដ-១៩សរុប កើនឡើងដល់ជាង១៤ពាន់នាក់ និងស្លាប់ជិត៣០០នាក់ ។
ចំណែកនៅលើពិភពលោកវិញ យោងតាម គេហទំព័រអន្តរជាតិ Worldometer បានបង្ហាញថា ការរីករាលដាលនៃជំងឺកូវីដ-១៩ នៅតែកើនឡើងខ្ពស់ដដែល ។ គិត ត្រឹមថ្ងៃទី២៥ ខែកក្កដា ឆ្នាំ២០២០នេះ ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ១៥,៩២៩,៦៧០នាក់ហើយ។ ក្នុងនោះអ្នកស្លាប់មានចំនួន ៦៤១,៨២៩នាក់ និងជាសះស្បើយឡើងវិញ ៩,៧១៤,៤៥៤នាក់៕ដោយ៖ធី រីណា
