សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ក្រុមបាតុករនៅទីក្រុង Seattle នៅថ្ងៃទី២៥ ខែកក្កដា (ពេលវេលាអាមេរិក) បានបន្តធ្វើបាតុកម្ម ហើយគប់ដបទឹក ដុំថ្ម …ទៅលើកម្លាំងសន្តិសុខ។មិនតែប៉ុណ្ណោះក៏មានការដុតបំផ្លាញរថយន្ត និងការដ្ឋានសំណង់ផងដែរ។ កម្លាំងសន្តិសុខបានចាប់ខ្លួនមនុស្ស៤៥នាក់ដែលបង្កហិង្សា រារាំងក្រុមសមត្ថកិច្ចបំពេញការងារ។
តាមការលើកឡើងរបស់មន្ត្រីសន្តិសុខនៅក្នុងតំបន់ ភាគច្រើនកម្លាំងប៉ូលិសទើបតែចូលធ្វើការវិញ ក្រោយពីមានរឿងរ៉ាវពាក់ព័ន្ធការរើសអើងជាតិសាសន៍។ ប៉ូលិសជាច្រើនរូបក៏បានរងរបួសនៅក្នុង ហេតុការណ៍វាយប្រហារពីក្រុមបាតុករផងដែរ។
ទីក្រុង Seattle ក្លាយទៅជាទីតាំង បាតុកម្មប្រឆាំងការរើសអើងជាតិសាសន៍ដែលស្មុគស្មាញបំផុតនៅអាមេរិក។ អំពើហិង្សាជាប្រព័ន្ធ បានកើតឡើងរវាងក្រុមជនជាតិស្បែកខ្មៅនឹងកម្លាំងសន្តិសុខក្រោយការស្លាប់បុរសស្មែកខ្មៅGeorge Floyd។
ប្រធានាធិបតី ដូណាល់ ត្រាំ បានលើកឡើងនៅក្នុងបទសម្ភាសន៍ជាមួយបណ្តាញព័ត៌មានFox News ថា លោកនឹងបញ្ជូនកម្លាំង ទាហាន៧៥ពាន់នាក់ទៅកាន់បណ្តារដ្ឋរបស់អាមេរិកដើម្បីទប់ស្កាត់អំពើហិង្សាដែលអាចកើតឡើង។
ជាមួយគ្នានេះដែរ នៅក្នុងរដ្ឋតិចសាស់ មានបាតុករម្នាក់បានរងការបាញ់សម្លាប់ពេលព្យាយាមចូលទៅក្បែររថយន្តមួយគ្រឿង ហើយអ្នកបើកបរក៏បានផ្ទុះអាវុធតែម្តង។ ហេតុការណ៍ខាងលើកើតឡើងនៅវេលាម៉ោង ១០ យប់ថ្ងៃទី ២៥ ខែកក្កដា (ម៉ោងនៅអាមេរិក) ស្ថិតនៅតំបន់ Austin រដ្ឋតិចសាស់៕ដោយ៖ធី រីណា
