សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បន្ទាប់ពីរដ្ឋមន្ត្រីការបរទេសហ្វីលីពីន ប្រតិកម្មទៅនឹងស្ថានទូតអាមេរិកដែលបានសរសេរថា រដ្ឋសាបា គឺជារបស់ម៉ាឡេស៊ី។ ប៉ុន្តែការអះអាងរបស់ហ្វីលីពីនថា រដ្ឋសាបា គឺជារបស់ហ្វីលីពីន។ រហូតធ្វើឲ្យរដ្ឋមន្ត្រីការទូតម៉ាឡេស៊ី និងហ្វីលីពីន បានទាស់សម្តីគ្នាជុំវិញការទាមទារទឹកដីរដ្ឋសាបារបស់ម៉ាឡេស៊ី ។
រដ្ឋមន្ត្រីការបរទេសហ្វីលីពីន លោក Teodoro Locsin បានសរសេរនៅលើបណ្តញសង្គម Twitter នៅថ្ងៃទី២៧ ខែកក្កដា ថ្មីៗនេះ ដោយអះអាងថា រដ្ឋសាបា មិនមែនស្ថិតក្នុងម៉ាឡេស៊ីទេ ប្រសិនបើចង់ធ្វើអ្វីមួយ ត្រូវមកធ្វើជាមួយហ្វីលីពីន។ ក្នុងសំណេររបស់ប្រមុខការទូតហ្វីលីពីន ជាការឆ្លើយបតបទៅនឹងស្ថានទូតអាមេរិក ដែលបានសរសេរនៅលើការផ្តល់សម្ភាររក្សាអនាម័យទៅឲ្យប្រជាជនហ្វីលីពីន ដែលជម្លៀសពីរដ្ឋសាបារបស់ម៉ាឡេស៊ី ទៅហ្វីលីពីនវិញ។
ដោយឡែករដ្ឋមន្ត្រីការបរទេសម៉ាឡេស៊ី លោក Hishammuddin Hussein បានសរសេរលើគណនី Twitter របស់ខ្លួនថា សំណេររបស់ប្រមុខការទូតហ្វីលីពីន គឺជាការមិនទទួលខុសត្រូវ និងធ្វើឲ្យប៉ះពាល់ទំនាក់ទំនងទ្វេភាគីរវាងម៉ាឡេស៊ី និងហ្វីលីពីន។ «រដ្ឋសាបា គឺជា និងជាផ្នែកមួយរបស់ម៉ាឡេស៊ីរហូតទៅ»។ លោក Hishammuddin បានលើកឡើងបែបនេះ ដោយបន្ថែមថា លោកនឹងកោះហៅអគ្គរដ្ឋទូតរបស់ហ្វីលីពីនមកជជែកគ្នាពីបញ្ហានេះ។
យ៉ាងណាក៏ដោយ ហ្វីលីពីន មិនបានដកថយឡើយ។ បើតាមការអះអាងរបស់លោក Locsin សេចក្ដីថ្លែងការណ៍របស់លោក គឺជាការពិតតាមប្រវត្តិសាស្ត្រ។ ប្រមុខការទូតហ្វីលីពីន ថែមទាំងរិះគន់ម៉ាឡេស៊ីទៀតថា គ្មានប្រទេសណាមួយ អាចប្រាប់ប្រទេសមួយទៀត ថាអាចនិយាយបាន ឬមិនបាន ជុំវិញរឿងដែលទាក់ទងនឹងសិទ្ធិរបស់គេឡើយ។ បន្ថែមពីលើនេះហ្វីលីពីន ក៏ប្រាប់ទៅម៉ាឡេស៊ីវិញថា ខ្លួននឹងកោះហៅអគ្គរដ្ឋទូតម៉ាឡេស៊ីដើម្បីមកជជែកពីបញ្ហានេះដែរ។
គួរបញ្ជាក់ថា ការទារមទារទឹកដីសាបា ជាទំនាស់យូរឆ្នាំរវាងសមាជិកអាស៊ានទាំងពីរ។ ប្រមាណជា៣០០ឆ្នាំមុន រដ្ឋសាបា ត្រូវបានគ្រប់គ្រងដោយរដ្ឋ Sulu ដែលស្ថិតនៅភាគខាងត្បូងរបស់ហ្វីលីពីន។ នៅក្នុងឆ្នាំ១៨៧៩ស្តេចស៊ុលតង់របស់ Sulu បានចុះហត្ថលេខាប្រគល់រដ្ឋមួយនេះឲ្យអង់គ្លេស។ ហ្វីលីពីន បានអះអាងថា កិច្ចព្រមព្រៀងនេះ គឺជាកិច្ចព្រមព្រៀងជួលជាជាងប្រគល់ទឹកដីឲ្យអង់គ្លេស។ ក្រោយមក រដ្ឋសាបា បានចូលជាសហព័ន្ធម៉ាឡេស៊ីនៅឆ្នាំ ១៩៦៣។ នេះបើតាមការចុះផ្សាយរបស់របស់សារព័ត៌មាន Straits Times។
បន្ទាប់ពីសាបាបានក្លាយជារបស់ម៉ាឡេស៊ី រដ្ឋSuluក៏បានស្ថិតនៅក្រោមការគ្រប់គ្រងរបស់ហ្វីលីពីនដែរ។ ម្យ៉ាងម៉ាឡេស៊ី ក៏នៅតែបន្តបង់ប្រាក់មកឲ្យរដ្ឋSulu ជាង១០០០ដុល្លារក្នុង១ឆ្នាំដែរ ដោយផ្អែកទៅតាមកិច្ចព្រមព្រៀងប្រវត្តិសាស្ត្រ។
សូមជម្រាបថា នៅក្នុងឆ្នាំ២០១៣ ប្រជាជនហ្វីលីពីន ដែលតាំងខ្លួនជាអ្នកជំនាន់ក្រោយរបស់រដ្ឋ Sulu ទាមទារយករដ្ឋសាបាមកវិញ ដែលបង្កឲ្យមានការប៉ះទង្គិចជាមួយប៉ូលីសម៉ាឡេស៊ី រហូតមានអ្នកស្លាប់ជាច្រើននាក់៕ដោយ៖ស តារា
