សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ យោងតាមរាយការណ៍អាជ្ញាធរប្រទេសវៀតណាម បានបញ្ជាក់ថា៖ ករណីឆ្លងCOVID-19 ក្នុងប្រទេសរបស់ខ្លួនមានការកើនឡើងខ្លាំង ខណៈរយៈពេល២ថ្ងៃជាប់គ្នានេះរកឃើញចំនួន ៤៩ករណីថ្មី និងមាន២ករណីស្លាប់។ តួលេខឆ្លងថ្មីនេះ គឺបូកបញ្ចូលគ្នាជាមួយនឹងករណីឆ្លងនៅល្ងាចថ្ងៃទី៣១ខែកក្កដា ដែលមានអ្នកឆ្លងចំនួន ៣៧ករណី និងស្លាប់១ នាក់បន្ថែមទៀតនិងអ្នកឆ្លងCOVID-19 នៅថ្ងៃទី១ ខែសីហា ដែលមានចំនួន ១២ករណី។
ក្រសួងសុខាភិបាលវៀតណាម បានចេញសេចក្តីប្រកាសរបស់ខ្លួនថា៖ពេលនេះអាជ្ញាធរ បានធ្វើតេស្តរកឃើញអ្នកជំងឺCOVID-19 ចំនួន៤៩នាក់និងមានអ្នកជំងឺ១នាក់ស្លាប់។ ករណីឆ្លងថ្មីទាំងអស់នេះ គឺមានពាក់ព័ន្ធទៅនឹងករណីឆ្លងនៅក្នុងទីក្រុងដាណាង។ សរុបករណីCOVID-19 នៅវៀតណាមមានចំនួន ៥៥៨ករណី និងអ្នកស្លាប់មាន ២នាក់។ ដោយករណីឆ្លងថ្មីនេះ មាននៅក្នុងក្រុងដាណាង ទីក្រុងហូជីមិញ ខេត្តQuang Nam ដែលជាខេត្តជាប់ក្រុងដាណាង។
គួរបញ្ជាក់ថា ក្រសួងសុខាភិបាលវៀតណាម បានបញ្ជូនក្រុមគ្រូពេទ្យច្រើនជាង ១០០០នាក់ទៅទីក្រុងដាណាង ដើម្បីគ្រប់គ្រងស្ថានភាពឆ្លងនិងសាងសង់មន្ទីរពេទ្យបណ្តោះអាសន្ន ដែលមានគ្រែអ្នកជំងឺចំនួន ១០០០គ្រែក្នុងទីក្រុងទេសចរណ៍នេះ ។ ដោយអាជ្ញាធរនៅក្នុងក្រុងហូជីមិញ បានធ្វើតេស្តលើប្រជាជន ដែលមានពាក់ព័ន្ធនឹងទីក្រុងដាណាង ចំនួន២១៧៣២នាក់ផងដែរ ។
គួររំលឹកផងដែរថា កាលពីពេលថ្មីៗនេះ នាយករដ្ឋមន្ត្រីវៀតណាម ធ្លាប់បានព្រមានថា រលកឆ្លងនៅវៀតណាមលើកនេះ គឺខុសពីរលកឆ្លងលើកទី២នៅក្នុងខែមីនា ដែលវៀតណាមធ្លាប់ប្រយុទ្ធប្រឆាំង ហើយគ្រប់ខេត្តក្រុងទាំងអស់ គឺស្ថិតក្នុងស្ថានភាពគ្រោះថ្នាក់ខ្ពស់ នៃការឆ្លងCOVID-19៕ដោយ៖ស តារា
