សារព័ត៌មាន នគរវត្ត តែងតែនាំមុខគេជានិច្ច
កីឡាអន្តរជាតិ៖ ក្លិបមេឃខៀវ Manchester City បានចុះហត្ថលេខាទិញយកកីឡាករសញ្ជាតិអេស្ប៉ាញ Ferran Torres ពីក្លិប Valencia ក្នុងកិច្ចសន្យារយៈពេល៥ឆ្នាំ។
Torres មានវ័យ២០ឆ្នាំ បានបង្ហាញខ្លួន៤៤ប្រកួតឲ្យ Valencia កាលពីរដូវកាលមុន និងរកបាន៦គ្រាប់។ គាត់បានបង្ហាញខ្លួនជាក្រុមដំបូងសម្រាប់ក្រុម Valencia កាលពីឆ្នាំ២០១៧ ។
Torres បាននិយាយថា “ខ្ញុំពិតជារីករាយណាស់ដែលបានចូលរួមជាមួយMan City។ កីឡាករគ្រប់រូបចង់ចូលរួមក្នុងក្រុម ដ៏ខ្លាំងមួយនេះ ក្លិបមេឃខៀវគឺជាក្លិបខ្លាំងបំផុតនៅក្នុងពិភពបាល់ទាត់”។
ខ្សែបម្រើស្លាបរូបនេះគឺជាកីឡាករចុះហត្ថលេខាទិញជាលើកដំបូងរបស់ក្លិប Man City នៅរដូវក្តៅនេះ ដោយមានតម្លៃ២៣លានអឺរ៉ូ (ប្រហែល២៧,១លានដុល្លារអាមេរិក)។
នាយកគ្រប់គ្រងបាល់ទាត់លោក Txiki Begiristain របស់ក្លិប Man City បាននិយាយថា “គាត់នៅក្មេងហើយនៅតែមានការអភិវឌ្ឍន៍ ប៉ុន្តែគុណភាពបច្ចេកទេសរបស់គាត់គឺពិតជាអ្វីដែលយើងកំពុងរកមើលនៅក្នុងខ្សែបម្រើស្លាបម្នាក់ដើម្បីប្រជែងយកឱកាសឈ្នះពានរង្វាន់រដូវកាលក្រោយ”។
សូមបញ្ជាក់ថា ក្រុម Man City បានបរាជ័យក្នុងការការពារតំណែងជើងឯកក្របខ័ណ្ឌអង់គ្លេស Premier League នៅរដូវកាលនេះដែលទើបចប់កាលពីខែកក្កដាកន្លងទៅ ដោយឈរចំណាត់ថ្នាក់លេខ២ តាមពីក្រោយក្រុមម្ចាស់ជើងឯកហង្សក្រហម Liverpool ដែលមានគំលាតរហូតដល់១៨ពិន្ទុ ៕ដោយ៖ភារៈ
