ព័ត៌មានទាន់ហេតុការណ៍៖

រន្ធត់ខ្លាំងណាស់!! ម៉ូតូ២គ្រឿងបុកគ្នាពេញទំហឹង​នៅលេីផ្លូវវេងស្រេង បណ្ដាលឲ្យបុរសម្នាក់ស្លាប់ក្នុងថ្លុកឈាម និងម្នាក់ទៀតរបួសធ្ងន់​

ចែករំលែក៖

ភ្នំពេញ​ ៖​ បុរសម្នាក់បានស្លាប់ក្នុងថ្លុកឈាម​ និងបុរសម្នាក់ទៀតរងរបួសធ្ងន់​ត្រូវបានបញ្ជូនទៅសង្គ្រោះនៅឯមន្ទីរពេទ្យ​ បន្ទាប់ពីភាគីម្ខាងជិះម៉ូតូបត់ឆ្លងផ្លូវបម្រុងត្រឡប់ក្រោយត្រូវភាគីម្ខាងទៀតជិះម៉ូតូក្នុងល្បឿនលឿនមកបុកពេញទំហឹង​ កាលពីវេលាម៉ោង១១ និង ៣០នាទីយប់ថ្ងៃទី៧​ ខែសីហា​ ឆ្នាំ ២០២០​ នៅចំណុចមុខសួនវឌ្ឍនៈ តាមបណ្ដោយផ្លូវវេងស្រេង ក្នុងសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។

      យោងតាមប្រភពព័ត៌មានពីកន្លែងកើតហេតុបានឲ្យដឹងថា​ មុនកើតហេតុគេឃើញបុរសម្នាក់ជិះម៉ូតូមួយគ្រឿងម៉ាកហុងដាឌ្រីម​ ស៊េរីឆ្នាំ២០១៦ ពណ៌ខ្មៅ​ ពាក់ស្លាកលេខភ្នំពេញ1FN-4528ធ្វើដំណើរតាមបណ្ដោយផ្លូវវេងស្រេង​ ទិសដៅពីលិចទៅកើត​ ខណៈមកដល់ចំណុចកើតហេតុខាងលើក៏បានបត់ឆ្វេងដៃបម្រុងត្រឡប់ក្រោយទៅទិសខាងលិចវិញ ភ្លាមនោះ​ក៏មានបុរសម្នាក់ជិះម៉ូតូមួយគ្រឿង​ ម៉ាកហុងដាឃ្លិក​ ពណ៌ក្រហម​ ពាក់ស្លាកលេខភ្នំពេញ1FQ-5567ធ្វើដំណើរបញ្ច្រាសគ្នាពីកើតទៅលិច​ ក្នុងល្បឿនលឿន​បានបុកម៉ូតូហុងដាឌ្រីមពេញទំហឹង​ បណ្ដាលឲ្យបុរសម្នាក់ជិះម៉ូតូហុងដាឌ្រីមស្លាប់ក្នុងថ្លុកឈាមយ៉ាងអាណោចអាធ័ម៌ ។ ចំណែកខាងភាគីម៉ូតូហុងដាឃ្លិកបានរងរបួសធ្ងន់ត្រូវបានរថយន្តសាមុយបញ្ជូនទៅសង្គ្រោះនៅឯមន្ទីរពេទ្យភ្លាមៗផងដែរ​ ។ 

    ក្រោយមក​សមត្ថកិច្ចមូលដ្ឋានបានចុះមកដល់កន្លែងកេីតហេតុ​ ហេីយបានទំនាក់ទំនងទៅសមត្ថកិច្ចជំនាញចរាចរណ៍ឲ្យមកធ្វើការវាស់វែងយកម៉ូតូទាំងពីរ គ្រឿងទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ​ រង់ចាំដោះស្រាយពេលក្រោយ​ ។

រីឯសពជនរងគ្រោះត្រូវបានសមត្ថកិច្ចធ្វើកំណត់ហេតុរួចទំនាក់ទំនងទៅសាច់ញាតិមកទទួលយកទៅធ្វើបុណ្យតាមប្រពៃណី៕ដោយ៖​ ភារ៉ា​ ដង្កោ


ចែករំលែក៖