សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ស្ត្រីម្នាក់បានស្លាប់ពេលបញ្ជូនទៅមន្ទីរពេទ្យបានត្រឹមតែពាក់កណ្តាលផ្លូវបន្ទាប់ពីត្រូវជនសង្ស័យជាប្ដីផឹកស្រាស្រវឹងហើយប្រចណ្ឌប្រពន្ធនឹងអ្នកផ្សេងបានទាញដំបងឫស្សីវាយចំកញ្ចឹងកពីក្រោយពេញទំហឹងបណ្ដាលឱ្យស្ត្រីរងគ្រោះដេកដួលហើយរត់គេចខ្លួនបាត់បង្កការភ្ញាក់ផ្អើលដល់អ្នកភូមិតែម្ដង។
ហេតុការណ៍នេះបានកើតឡើងកាលពីវេលាម៉ោង៦និង៣០នាទីព្រលប់ថ្ងៃទី៩ ខែសីហា ឆ្នាំ២០២០ ស្ថិតក្នុងភូមិលក្ខរាជា ឃុំកំពង់ចក ស្រុករំដួល។
បើតាមសមត្ថកិច្ចនគរបាលស្រុកបានឱ្យដឹងថា ស្ត្រីរងគ្រោះដែលស្លាប់មានឈ្មោះម៉ៅ ណេន អាយុ៣១ឆ្នាំ រស់ក្នុងភូមិឃុំកើតហេតុខាងលើ។
ចំណែកជនសង្ស័យជាប្ដីមានឈ្មោះប៉ា រ៉េត អាយុ៣៨ឆ្នាំ ក្រោយពីធ្វើសកម្មភាពរួចបានរត់គេចខ្លួនបាត់ស្រមោល។
តាមអ្នកភូមិបានឱ្យដឹងថា មុនកើតហេតុគាត់ឃើញជនសង្ស័យជាប្ដីបានផឹកស្រាស្រវឹងហើយក៏រករឿងប្រពន្ធព្រោះតែប្រ
ចណ្ឌនឹងអ្នកផ្សេង ទើបមានជម្លោះពាក្យសម្តីយ៉ាងខ្លាំង។ក្រោយមកជនសង្ស័យបានទាញយកដំបងឫស្សីប្រវែងកន្លះម៉ែត្រ វាយទៅលើប្រពន្ធចំកញ្ចឹង.ករួចក៏រត់គេចខ្លួនបាត់ភ្លាមៗ។
ក្រោយមកស្ត្រីរងគ្រោះត្រូវបានបងប្អូនក្រុមគ្រួសារបញ្ជូនទៅសង្គ្រោះនៅមន្ទីរពេទ្យបង្អែកខេត្ត ប៉ុន្តែដោយសារអាការធ្ងន់ធ្ងរបានស្លាប់ពាក់កណ្ដាលផ្លូវ។
បច្ចុប្បន្ន សមត្ថកិច្ចនគរបាលស្រុកកំពុងស្វែងរកចាប់ខ្លួនជនសង្ស័យយកមកចាត់ការបន្តតាមច្បាប់៕ យឹម សុថាន
