សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ខ្មាន់កាំភ្លើងជិះម៉ូតូបានបាញ់សម្លាប់ អ្នកទេសចរជនជាតិបារាំង៦នាក់ និងជនជាតិនីហ្សេ២នាក់នៅក្នុងឧទ្យានអភិរក្សសត្វព្រៃ ក្នុងប្រទេសនីហ្សេ(Niger) នាថ្ងៃទី៩ខែសីហា។ នៅពេលនេះក្រុមអ្នកជំនាញកំពុងតែស្រាវជ្រាវករណីបាញ់ប្រហារខាងលើ។
ការិយាល័យប្រធានាធិបតីម៉ាក្រុង បានបញ្ជាក់ថា មានពលរដ្ឋបារាំង៦នាក់ស្លាប់ ដោយការបាញ់ប្រហារ ប៉ុន្តែមិនបានបញ្ជាក់ព័ត៌មានលម្អិតនោះឡើយ។ អភិបាល រដ្ឋTillaberi លោក Tidjani Ibrahim Katiella បាននិយាយទៅកាន់សារព័ត៌មានរ៉យទ័រថា ក្រុមអ្នកទេសចរជនជាតិបារាំងរងការបាញ់ប្រហារនៅតំបន់អភិរក្សសត្វកវែងស្ថិតនៅក្នុងស្រុក Koure រដ្ឋ Tillaberi ក្នុងប្រទេសតំបន់អាហ្វ្រិកខាងលិច។
អភិបាលរដ្ឋ Tillaberi បានប្រកាសថា «មានមនុស្ស ៨នាក់ស្លាប់ ជនជាតិបារាំង ៦នាក់និងជនជាតិនីហ្សេ២នាក់ ក្នុងនោះមានអ្នកបើកបរម្នាក់។ នៅពេលនេះយើងកំពុងតែស្រាវជ្រាវហើយនឹងផ្តល់ព័ត៌មានលម្អិតក្នុងពេលឆាប់ៗខាងមុខ» ។
សារព័ត៌មានAFPបានផ្សាយថា ជនរងគ្រោះរងការបាញ់ប្រហារ ហើយក្រុមអ្នកស្រាវជ្រាវបានរកឃើញគ្រាប់កាំភ្លើងជាច្រើន នៅកន្លែងកើតហេតុ។ មកទល់ពេលនេះយើងមិនទាន់ដឹងអត្តសញ្ញាណជនដៃដល់ នៅឡើយទេ ប៉ុន្តែក្រុមជនដៃដល់ជិះម៉ូតូ ហើយពួកនៅដើមឈើរង់ចាំអ្នកមនុស្សទៅដល់បាញ់ប្រហារតែម្តង។
នៅកន្លែងកើតហេតុ សាកសពជនរងគ្រោះបានដាក់ជិតគ្នានៅក្បែររថយន្តដែលឆេះខ្ទេច ។ នៅពេលនេះដែររដ្ឋាភិបាលបារាំងបានព្រមានដល់ពលរដ្ឋរបស់ខ្លួនមិនត្រូវទៅកាន់ព្រៃនៃប្រទេសនីហ្សេដែលជាទីតាំងគ្រប់គ្រងរបស់ក្រុមអ៊ិស្លាម ប៊ូកូហារ៉ាម ដែលជាសាការក្រុមរដ្ឋអ៊ិស្លាម។
តំបន់អភិរក្សសត្វកវេង Koure នៅចម្ងាយពីទីក្រុងNiamey ៦០គីឡូម៉ែត្រនៅភាគអាគ្នេយ៍ជាតំបន់ទាក់ទាញភ្ញៀវទេសចរជាច្រើននៅនីហ្សេ៕ដោយ៖ធី រីណា
