សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម ៖ ខ្មោចនាវាចម្បាំង១គ្រឿង រួមជាមួយគ្រាប់យុទ្ធភណ្ឌមិនទាន់ផ្ទុះចំនួន៣ប្រភេទត្រូវបានគេរកឃើញនៅក្នុងទឹកទន្លេមេគង្គ ស្ថិតក្នុងភូមិវាល ឃុំមានជ័យ ស្រុកស្រីសន្ធរ ខេត្តកំពង់ចាម ដែលគេសង្ស័យថាជាសំណល់ពីសម័យសង្គ្រាម ។
បន្ទាប់ពីទទួលបានសេចក្ដីរាយការណ៍ពីអាជ្ញាធរមូលដ្ឋាននាព្រឹកថ្ងៃទី១២ ខែសីហា ឆ្នាំ២០២០ លោក អ៊ុន ចាន់ដា អភិបាលខេត្តកំពង់ចាម អមដំណើរដោយអភិបាលរងខេត្ត និងមន្ត្រីពាក់ព័ន្ធបានអញ្ជើញចុះពិនិត្យទីតាំងខ្មោចនាវាលិចទឹកខាងលើដើម្បីរៀបចំឲ្យមានកម្លាំងសមត្ថកិច្ចប្រចាំការនៅតំបន់នោះ រហូតគ្រាប់យុទ្ធភណ្ឌទាំងអស់ត្រូវបានយកចេញដោយសុវត្ថិភាព។
ជាមួយគ្នានោះលោកអភិបាលខេត្តក៏បានអំពាវនាវដល់បងប្អូនប្រជាពលរដ្ឋកុំឲ្យចូលទៅធ្វើការនេសាទក្នុងតំបន់ហាមឃាត់នោះជាដាច់ខាត ព្រោះវាអាចបង្កឲ្យមានគ្រោះថ្នាក់ដល់អាយុជីវិតបានគ្រប់ពេល ដូច្នេះត្រូវរង់ចាំរហូតដល់មន្ត្រីជំនាញមកធ្វើការបោសសម្អាត គ្រាប់យុទ្ធភណ្ឌទាំងនោះ រួចរាល់ហើយទេីបយេីងចូលទៅបាន។
គួរបញ្ជាក់ផងដែរថា កាលពីពេលកន្លងទៅថ្មីៗនេះ មានក្រុមហ៊ុនសហគ្រាសសុភារ័ត្នអភិវឌ្ឍន៍ បានបូមយកខ្សាច់នៅតំបន់នោះទេីបប្រទះឃើញគ្រាប់ចំនួន៣ប្រភេទ គឺមាន ១-គ្រាប់AK57ចំនួន៣គីឡូក្រាម ២-គ្រាប់៦០មិល្លីម៉ែត្រ ចំនួន១៦គ្រាប់ និងគ្រាប់៨០មិលី្លម៉ែត្រ ចំនួន១គ្រាប់ ហើយអាជ្ញាធរមូលដ្ឋាននិងមន្ត្រីជំនាញពាក់ព័ន្ធដែលមានមន្ត្រីស៊ីម៉ាក់ និងក្រុមជំនាញមុជទឹកដែលមានទីស្នាក់ការនៅខេត្តកំពង់ឆ្នាំងមកមុជទឹកពិនិត្យទីតាំងបូមខ្សច់នោះ ហើយជាលទ្ធផលពេលមុជទឹកជម្រៅ១៩ម៉ែត្រ ក្រុមជំនាញបានពិនិត្យឃើញទ្រង់ទ្រាយជាម៉ារីន (នាវាចម្បាំង)មួយគ្រឿងផងដែរ៕
ប្រភព៖ ទទក
