សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មានហេតុការណ៍ដ៏ភ្ញាក់ផ្អេីលមួយបានកេីតឡេីង ខណៈបុរសម្នាក់មានវិបត្តិក្នុងគ្រួសារបន្តិចបន្តួចជិះម៉ូតូមួយគ្រឿងមកប៉ុនប៉ងលោតសម្លាប់ខ្លួនលើស្ពានអាកាសស្ទឹងមានជ័យតែមិនបានសម្រេចត្រូវបងប្អូនប្រជាពលរដ្ឋជួយទាន់ កាលពីវេលាម៉ោង៨ យប់ថ្ងៃទី១៣ខែសីហាឆ្នាំ ២០២០ នៅចំណុចលើស្ពានអាកាសស្ទឹងមានជ័យ តាមបណ្តោយផ្លូវលេខ២៧២ ក្នុងសង្កាត់ស្ទឹងមានជ័យទី១ ខណ្ឌមានជ័យរាជធានីភ្នំពេញ។
យោងតាមប្រភពពីប្រជាពលរដ្ឋដែលឃើញហេតុការណ៍នេះបានប្រាប់ឲ្យដឹងថា មុនកើតហេតុគេឃើញបុរសខាងលើជិះម៉ូតូមួយគ្រឿងធ្វើដំណើរតាមដងផ្លូវលេខ២៧១ក្នុងទិសដៅពីជើងទៅត្បូង លុះមកដល់ចំណុចកើតហេតុខាងលើបានឈប់ម៉ូតូរួចឡើងលើបង្កាន់ដៃស្ពានប៉ុនប៉ងលោតសម្លាប់ខ្លួនតែមិនបានសម្រេច ត្រូវបានបងប្អូនប្រជាពលរដ្ឋឃើញទាន់ចុះទៅជួយធ្វើអន្តរាគមន៍ទាន់ពេលវេលា ហើយបាននាំជនរងគ្រោះមកក្រោមស្ពានធ្វើការសួរនាំហើយជនរងគ្រោះបានឆ្លើយប្រាប់ថាគាត់មានវិបត្តិក្នុងគ្រួសារបន្តិចបន្តួច រួចហើយអ្នកជួយសង្គ្រោះក៏បានរាយការណ៍ជូនសមត្ថកិច្ចភ្លាមៗ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ធ្វើការសួរនាំបុរសខាងលើរួចក៏បានទំនាក់ទំនងទៅសាច់ញាតិឱ្យមកយកជនរងគ្រោះត្រឡប់ទៅផ្ទះវិញផងដែរ៕ ដោយ៖ ភារ៉ា ដង្កោ
