សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បើតាមការអះអាងរបស់ មន្រ្ដីជាន់ខ្ពស់ក្រសួងកសិកម្ម នាពេលថ្មីៗនេះថា ក្នុងរយៈពេល៧ខែ ឆ្នាំ២០២០នេះ ប្រទេសកម្ពុជាបាននាំចេញផលិតផលកសិកម្មជាង២លានតោនទៅទីផ្សារអន្តរជាតិ ដែលទំនិញទាំងនេះគឺសុទ្ធតែមានការកត់ត្រាជាផ្លូវការ និងឆ្លងកាត់ការត្រួតពិនិត្យភូតគាមអនាម័យពីអ្នកបញ្ជាទិញ ។
លោក ងិន ឆាយ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានកសិកម្មមានប្រសាសន៍ថា កម្ពុជាបាននាំចេញអង្ករដំឡូងមីគ្រាប់ស្វាយចន្ទី គ្រាប់ពោត ចេកស្រស់ ផ្លែស្វាយ ដូងប្រេង និងម្ទេសស្រស់ដែលសរុបមានជាង២លានតោន បើប្រៀបធៀបនឹងឆ្នាំ២០១៩មានការកើនឡើង៩ភាគរយ ។
មន្រ្ដីជាន់ខ្ពស់ក្រសួងកសិកម្មរូបនេះ បានបញ្ជាក់ថា ការនាំចេញផលិតផលកសិកម្មជាង២លានតោននេះ មានទៅប្រទេស ចិន ថៃវៀតណាម ឥណ្ឌាអឺរ៉ុប ជប៉ុន រុស្ស៊ី និងប្រទេសអូស្ត្រាលីជាដើម។ លោកបន្ថែមថា«ដើមឆ្នាំ២០២០នេះ យើងសម្រេចបានចំនួន២,០៦៨៩៨៧តោន កើនលើសឆ្នាំមុនគិតក្នុងរយៈពេលដូចគ្នាប្រមាណ៩ភាគរយ ក្នុងនោះទៅសហគមន៍អឺរ៉ុប មានកំណើន៣៧,៧០ភាគរយ ទៅប្រទេសចិនមានកំណើន២៥,៩១ភាគរយ ដោយឡែកទៅប្រទេសអាស៊ានកើន៤៤ភាគរយនិងប្រទេសដ៏ទៃទៀតមានការកើនឡើងខ្ពស់រហូតដល់៧២,៤០ភាគរយ»។
លោក ងិន ឆាយ បន្ដថា កំណើននៃបរិមាណនាំចេញនេះ គឺជាកត្តាឆ្លុះបញ្ចាំងអំពីការផ្លាស់ប្តូរជាវិជ្ជមានទាំងបរិមាណ និងគុណភាពនៃផលិតកម្មកសិកម្មនៅក្នុងប្រទេសកម្ពុជា ។ មិនតែប៉ុណ្ណោះលោកបានបញ្ជាក់ទៀតថាអនាម័យ និងភូតគាមអនាម័យ គឺបានដើរតួនាទីយ៉ាងសំខាន់ ដែលមិនអាចខ្វះបាន និងជាស្ពានចម្លងផលិតផលកសិកម្មកម្ពុជាទៅកាន់ទីផ្សារបរទេស៕
ដោយ៖ស តារា
