សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ដែលគេបានឱ្យដឹងថា ជាមន្ត្រីក្រសួងមហាផ្ទៃ បានជិះរថយន្តស៊េរីទំនើបមួយគ្រឿង តែដាក់ស្លាកលេខរថយន្តរបស់គេ ត្រូវបានម្ចាស់គេតាមទាន់។
ប្រភពព័ត៌មានពីបុរសដែលជាម្ចាស់ស្លាកលេខដែលបានបាត់ បានប្រាប់ឱ្យដឹងថា ប្រហែលជា១ខែមុន (ខែកក្កដា) គាត់បានជិះរថយន្តមួយគ្រឿងម៉ាក ព្រូស ដែលពាក់ស្លាកលេខ ភ្នំពេញ 2AY-9021 រួចចតរថយន្តរបស់គាត់ចោលនៅទឹកដី សង្កាត់បឹងរាំង( ពេលយប់) ខណៈពេលគាត់ចេញមកយករថយន្តគាត់វិញស្រាប់តែបាត់ស្លាកលេខរថយន្តរបស់គាត់ រហូតដល់បច្ចប្បន្ន នៅព្រឹកថ្ងៃទី២១ ខែសីហា ឆ្នាំ២០២០នេះទើបឃើញនៅលើរថយន្តស៊េរីទំនើបមួយគ្រឿង ម៉ាក ឡិចសុីសRX-400hមួយគ្រឿងនៅក្បែរប៉ុស្តិ៍នគរបាលរដ្ឋបាលអូរឬស្សីទី៤ រួចទាក់ទងទៅកម្លាំងសមត្ថកិច្ចប៉ុស្តិ៍ជួយឃាត់រថយន្តនោះដើម្បីធ្វើការដោះស្រាយ។
តាមប្រភពព័ត៌មានពីម្ចាស់រថយន្តឡិចសុីស ដែលជាមន្ត្រី ក្រសួងមហាផ្ទៃ ដែលដាក់ស្លាកលេខគេ បានប្រាប់ឱ្យដឹងថា រូបខ្លួនបានទិញរថយន្តមួយគ្រឿងម៉ាក ឡិចសុីស ពណ៌ស ពាក់ស្លាកលេខ 2AY-9021 ចេញពីឃ្លាំងលក់រថយន្តមួយកន្លែង ជាង២សប្តាហ៍ហើយ ថែមទាំងដឹងថាស្លាកលេខនេះមិនមែនជាស្លាកលេខរថយន្តរបស់ខ្លួន រួចរូបខ្លួនបានជិះរថយន្តដែលខ្លួនទិញមក រហូតដល់បច្ចប្បន្ន។
រហូតព្រឹកថ្ងៃទី២១ ខែសីហា ឆ្នាំ២០២០ នេះបានជិះមកចតនៅតាមបណ្តោយផ្លូវលេខ១០៧ ស្រាប់តែម្ចាស់ស្លាកលេខរថយន្តព្រូស តាមរកឃើញនៅនឹងកន្លែងកើតហេតុខាងលើ។
បច្ចប្បន្ន ភាគីទាំងសងខាងរួមទាំងរថយន្ត ត្រូវបានកម្លាំងសមត្ថកិច្ចប៉ុស្តិ៍នគរបាលរដ្ឋបាល បឹងរាំង យកទៅដោះស្រាយតាមនីតិវិធីច្បាប់៕ ដោយ ៖ រ៉ារ៉ា
