សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ យោងតាមសេចក្តីថ្លែងការណ៍មួយ នៅថ្ងៃទី២០ សីហាម្សិលមិញនេះ របស់មូលនិធិវិនិយោគផ្ទាល់ប្រទេសរុស្ស៊ី ដែលផ្តល់ប្រាក់ដល់គម្រោងវ៉ាក់សាំង COVID-19 ឈ្មោះ Sputnik V នឹងត្រូវដាក់ឲ្យធ្វើតេស្តលើមនុស្សចំនួន៤ម៉ឺននាក់ ចាប់ផ្តើមពីសប្តាហ៍ក្រោយនេះ ។ដោយវ៉ាក់សាំងSputnik V គឺជាវ៉ាក់សាំងCOVID-19 ដំបូងគេបង្អស់ដែលត្រូវបានផលិតឡើង ប៉ុន្តែប្រសិទ្ធភាព និងសុវត្ថិភាពរបស់វ៉ាក់សាំងនេះ ត្រូវបានចោទជាសំណួរ ដោយសារពុំមានព័ត៌មានពីការធ្វើតេស្តគ្រប់គ្រាន់។
នៅក្នុងសេចក្តីថ្លែងការណ៍ បានបញ្ជាក់ថា «ការធ្វើតេស្តលើសមត្ថភាពក្នុងការឆ្លើយតបរបស់ភាពស៊ាំ និងសុវត្ថិភាពរបស់វ៉ាក់សាំងSputnik V និងចាប់ផ្តើមនៅសប្តាហ៍ក្រោយ ដោយរួមបញ្ចូលមនុស្ស៤ម៉ឺននាក់»។ ហើយការធ្វើតេស្តនេះមានលក្ខណៈដូចការធ្វើតេស្តដំណាក់កាលទី៣របស់វ៉ាក់សាំងដទៃទៀតដែរ។
បើតាមទីភ្នាក់ងារព័ត៌មាន AFP លោក Kirill Dmitriyev ប្រធានមូលនិធិវិនិយោគផ្ទាល់រុស្ស៊ី និយាយក្នុងសន្នីសិទសារព័ត៌មានថា ការចាក់វ៉ាក់សាំងទៅលើក្រុមមនុស្សដែលប្រឈមនឹង COVID-19 រួមមានគ្រូពេទ្យ នឹងត្រូវចាប់ផ្តើមនៅសប្តាហ៍ក្រោយ ហើយធ្វើឡើងដោយការស្ម័គ្រចិត្ត។ រហូតមកទល់ពេលនេះ មានប្រទេសច្រើនជាង២០បានធ្វើសំណើសុំទិញវ៉ាក់សាំងCOVID-19 រាប់ពាន់លានដូស ខណៈរុស្ស៊ីក៏មានកិច្ចព្រមព្រៀងជាមួយប្រទេសមួយចំនួនក្នុងការផលិតវ៉ាក់សាំង។
លោក Dmitriyev បានបន្ថែមថា ការចាក់វ៉ាក់សាំងទ្រង់ទ្រាយធំត្រូវរំពឹងនឹងចាប់ផ្តើមក្នុងខែតុលា ចំណែកឯការនាំចេញទៅក្រៅប្រទេសអាចនឹងធ្វើឡើងនៅខែវិច្ឆិកា ឬខែធ្នូ។
ចំណែកឯបញ្ហាទាក់ទិនទៅនឹងមន្ទិលសង្ស័យទៅលើប្រសិទ្ធិភាពវ៉ាក់សាំងពីបណ្តាប្រទេសដទៃ និងអង្គការសុខភាពពិភពលោក(WHO) លោកDmitriyev បានលើកឡើងថា៖« យើងឃើញមានការប្រែប្រួលយ៉ាងច្រើនចំពោះពាក្យសម្តីរបស់ WHO ។ ជាការពិត ដំបូងឡើយពួកគេមិនទាន់មានព័ត៌មានគ្រប់គ្រាន់ តែពេលនេះព័ត៌មានផ្លូវការត្រូវបានបញ្ជូនទៅ ហើយWHO នឹងវាយតម្លៃវ៉ាក់សាំង»។
បច្ចុប្បន្ននេះ បើគិតត្រឹមថ្ងៃទី២១ សីហានេះ រុស្ស៊ីមានចំនួនអ្នកឆ្លងCOVID-19 ៩៤២,១០៦ ករណី និងមានអ្នកស្លាប់ចំនួន១៦,០៩៩ នាក់។ រុស្ស៊ីជាប្រទេសដែលមានអ្នកឆ្លងច្រើនលំដាប់ទី៤ បន្ទាប់ពីអាមេរិក ប្រេស៊ីល និងឥណ្ឌា៕ដោយ៖ស តារា
