ប្រធានាធិបតីប្រេស៊ីល ប្រកាសថា ប្រទេសខ្លួនកំពុងវិលទៅរកភាពប្រក្រតីវិញ

អន្តរជាតិ៖ បើទោះបីជាករណីឆ្លងជំងឺ COVID-19 ពេលនេះបានលោតដល់ជាង ៣.៥លានករណីក៏ដោយ ប៉ុន្តែពេលនេះ ប្រធានាធិបតីប្រេស៊ីលលោកហ្ស៊ែរ បូលសូណារ៉ូ (Jair Bolsonaro) បានប្រកាសកាលពីថ្ងៃសុក្រទី២១ខែសីហាម្សិលមុិញនេះថា ប្រទេសអាមេរិកឡាទីនមួយនេះ កំពុងតែវិលទៅរកភាពប្រក្រតីវិញហើយ ។

បើតាមទីភ្នាក់ងារព័ត៌មានចិនស៊ីនហួរ បានចេញផ្សាយនាព្រឹកថ្ងៃសៅរ៍ ទី២២ខែសីហា ឆ្នាំ២០២០នេះថា ប្រធានាធិបតីប្រេស៊ីលលោកBosonaro បានបង្ហោះសារមួយនៅលើគណនី Twitter របស់លោកថា ការងារសរុបជាង១៣១,០០០កន្លែងត្រូវបានបង្កើតឡើង នៅក្នុងប្រទេសប្រេស៊ីលកាលពីខែកក្កដា ហើយវាពិតជាលទ្ធផលដ៏វិជ្ជមានមួយ បើយើងគិតចាប់តាំងពីខែមីនា ឆ្នាំ២០២០ ដែលប្រទេសប្រេស៊ីលបានចាប់ផ្តើមរងគ្រោះ កាន់តែធ្ងន់ធ្ងរឡើងៗ ដោយសារតែជំងឺរាតត្បាតសកល COVID-19។

សូមជម្រាបថា ចំពោះការបង្កើនការងារដ៏វិជ្ជមាននោះ គឺទៅលើវិស័យផលិតចំណីអាហារ, សំណង់ស៊ីវិល និងផ្នែកឧស្សាហកម្មមួយចំនួនទៀត។ ព្រោះរដ្ឋាភិបាលប្រេស៊ីល ដែលតែងតែយកបញ្ហាសេដ្ឋកិច្ច ធំជាងវិបត្តិជំងឺឆ្លងCOVID-19 នោះបានរំពឹងថា សេដ្ឋកិច្ចរបស់ខ្លួននឹងវិលទៅរកភាពប្រក្រតីវិញសន្សឹមៗ បន្ទាប់ពីបានមើលឃើញភាពវិជ្ជមានកាលពីខែកក្កដា។

បើគិតត្រឹមថ្ងៃសុក្រទី២១ ម្សិលមិញនេះ ប្រទេសប្រេស៊ីលមានករណីឆ្លងCOVID-19 សរុបជាង ៣,៥៣៦,០០០ករណី ក្នុងនោះស្លាប់ជាង១១៣,៤០០នាក់ និងជាសះស្បើយវិញជាង ២,៦៧០,៧០០នាក់។អង្គការសុខភាពពិភពលោក (WHO) បានប្រកាសថា អត្រាឆ្លង COVID-19 ប្រចាំថ្ងៃនៅប្រេស៊ីលមានសភាពនឹងនរ និងបង្ហាញសញ្ញាធ្លាក់ចុះវិញតិចតួច ប៉ុន្តែប្រទេសធំជាងគេនៅអាមេរិកឡាទីនមួយនេះ មិនគួរមានការធ្វេសប្រហែសនោះឡើយ៕ដោយ៖ស តារា