សារព័ត៌មាន នគរវត្ត តែងតែនាំមុខគេជានិច្ច
ហ្វុីលីពីន៖ មានករណីវាយប្រហារគ្រាប់បែកជាបន្តបន្ទាប់នៅស្រុក Jolo ភាគខាងត្បូងហ្វុីលីពីន បណ្តាលឲ្យមនុស្ស ១០នាក់ស្លាប់ និងរាប់សិបនាក់រងរបួស ។
កម្លាំងប៉ូលិសហ្វុីលីពីន បានឲ្យដឹងថា ការវាយប្រហារគ្រាប់បែក នៅវេលាម៉ោង១២ថ្ងៃត្រង់ស្ថិតនៅលើកោះJolo និងតំបន់ជិតខាងនៅក្នុងខេត្ត Sulu ភាគខាងត្បូងប្រទេសនេះ។
ការផ្ទុះគ្រាប់បែកលើកទីមួយកើតឡើងនៅមុខហាងលក់ទំនិញ ដោយពេលនោះរថយន្តមួយគ្រឿងផ្ទុកគ្រាប់រំសេវ បើកសំដៅបុករថយន្តយោធា ។ ប៉ុន្មាននាទីក្រោយមក មានករណីផ្ទុះជាលើកទីពីរ នៅមុខធនាគារ ដែលមានចម្ងាយពីការផ្ទុះលើកទីមួយតែ១០០ម៉ែត្រ ប៉ុណ្ណោះ។
តាមការស្រាវជ្រាវជាបឋម ការផ្ទុះលើកទីពីរ បង្កឡើងដោយស្ត្រី វាយប្រហារអត្តឃាតបណ្តាលឲ្យមានអ្នកស្លាប់និងរបួសជាច្រើន។ តាមរបាយការណ៍របស់កម្លាំងប៉ូលិសក្នុងតំបន់ ការវាយប្រហារទាំងពីរលើក បណ្តាលឲ្យមានអ្នកស្លាប់១០នាក់ និង ៤០នាក់រងរបួស ក្នុងនោះមានទាហាន ១៦នាក់និងពលរដ្ឋស្លូតត្រង២៤នាក់។
ខេត្ត Sulu របស់ហ្វុីលីពីន ជាតំបន់មានពលរដ្ឋអ៊ិស្លាមរស់នៅភាគច្រើន និងជាតំបន់ដែលក្រុមឧទ្ទាមអ៊ិស្លាម Abu Sayyaf មានទំនាក់ទំនងជាមួយក្រុមរដ្ឋអ៊ិស្លាមធ្វើសកម្មភាពនៅទីនោះ ដោយមានការចាប់ជំរិតវាយប្រហារគ្រាប់បែកជាដើម ៕
ដោយ៖ធី រីណា
