សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរស២នាក់ត្រូវរថយន្ដមិនចាំម៉ាកបើកបុកបណ្ដាលឲ្យស្លាប់ទាំង២នាក់យ៉ាងអាណោចអាធ័ម រួចរថយន្តបង្កបន្ដបើករត់បាត់ បង្កឲ្យមានការភ្ញាក់ផ្អេីល កាលពីវេលាម៉ោង៨និង៣០នាទីយប់ ថ្ងៃទី៣០ ខែសីហា ឆ្នាំ២០២០ ស្ថិតនៅតាមបណ្ដោយផ្លូវបេតុង ក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
សមត្ថកិច្ចបានឲ្យដឹងថា សពជនរងគ្រោះទី១-ឈ្មោះនូ កាន ភេទប្រុស អាយុ២៣ឆ្នាំ មុខរបរជាកម្មករសំណង់ មានស្រុកកំណើតនៅខេត្តព្រៃវែង និងសពជនរងគ្រោះទី២-ឈ្មោះផន វណ្ណៈភេទប្រុស អាយុ២៣ឆ្នាំ មុខរបរជាកម្មករសំណង់ មានស្រុកកំណើតនៅ ស្រុកកៀនស្វាយ ខេត្តកណ្ដាល។
យោងតាមប្រភពព័ត៌មានពីកន្លែងកើតហេតុបានឱ្យដឹងថា ដំបូងគេឃើញបុរស២នាក់ជិះម៉ូតូវ៉េវ ពណ៌ខ្មៅ ពាក់ស្លាកលេខព្រៃវែង1M-8712 ធ្វើដំណើរក្នុងទិសដៅពីជើងទៅត្បូងក្នុងល្បឿនមធ្យម ខណៈមកដល់ចំណុចកើតហេតុជាផ្លូវកែងក៏មានរថយន្ដមួយគ្រឿងដែលមិនចាំម៉ាកបានបើកបុកនិងកិនពីលើម៉ូតូបណ្ដាលឲ្យស្លាប់ទាំង២នាក់យ៉ាងអាណោចអាធ័មតែម្ដង ចំណែកឯម្ចាស់រថយន្ដបង្កវិញឃើញដូច្នោះក៏បានបើករត់គេចបាត់ស្រមោលទៅ។
ក្រោយពេលកើតហេតុសមត្ថកិច្ចមូលដ្ឋានបានទាក់ទងខាងសមត្ថកិច្ចជំនាញចុះមកវាស់វែងនិងយកម៉ូតូជនរងគ្រោះទៅរក្សាទុករង់ចាំប្រគល់ជូនសាច់ញាតិនៅពេលក្រោយ ។ ចំណែកសពបុរសទាំង២នាក់សមត្ថកិច្ចបានធ្វេីឯកសារប្រគល់ឲ្យបងប្អូននិងសាច់ញាតិទទួលយកទៅធ្វើបុណ្យតាមប្រពៃណីរៀងៗខ្លួន៕
ដោយ៖ ភារ៉ា ដង្កោ
