សារព័ត៌មាន នគរវត្ត តែងតែនាំមុខគេជានិច្ច
ខេត្តមណ្ឌលគិរី៖ រថយន្តមួយគ្រឿងបានឆាបឆេះខណៈដែលកំពុងតែបើកបរតាមដងផ្លូវ ហើយត្រូវបានកម្លាំងជំនាញការិយាល័យនគរបាលបង្ការពន្លត់អគ្គិភ័យខេត្តបានចេញរថយន្តចំនួន២គ្រឿងទៅសហការជាមួយកម្លាំងអធិការដ្ឋានក្រុងសែនមនោរម្យនិងកម្លាំងប៉ុស្តិ៍រមនាបាញ់ពន្លត់អស់ទឹកចំនួន២ឡានទើបរលត់ទាំងស្រុង ចំណែករថយន្តនោះត្រូវភ្លើងឆេះសល់តែគ្រោងដែក។ហេតុការណ៍នេះបានកើតឡើងកាលពីវេលាម៉ោង ១១និង៣៥នាទី ថ្ងៃទី៣១ ខែសីហា ឆ្នាំ២០២០ នៅចំណុចផ្លូវជាតិលេខ៧៦ ចន្លោះគីឡូម៉ែត្រលេខ១៣៣និង១៣៤ ដែលស្ថិតនៅក្នុងភូមិពូង សង្កាត់រមនា ក្រុងសែនមនោរម្យ ខេត្តមណ្ឌលគិរី។
បើតាមការបញ្ជាក់ពីសមត្ថកិច្ចដែលនៅកន្លែងកើតហេតុបានឲ្យដឹងថា រថយន្តខាងលើនេះនេះឆ្លងភ្លើងពីក្បាលអាគុយទើបបណ្តាលឱ្យឆេះតែម្តង ។
អ្នកបើករថយន្តឈ្មោះ ថុង ថា ភេទប្រុស អាយុ៣៤ឆ្នាំ ជនជាតិខ្មែរ រស់នៅភូមិពូក្រូច ឃុំស្រែអំពូង ស្រុកពេជ្រាដា ខេត្តមណ្ឌលគិរី។ រថយន្តម៉ាកនីស្សាន់ណាវ៉ារ៉ា ពណ៍សំបកឪឡឹក ពាក់ស្លាកលេខភ្នំពេញ AD-9519 ម្ចាស់ពុំមានរងរបួសទេ ហើយរថយន្តនោះដឹកម្រេចចំនួនប្រហែលមួយតោនកន្លះ តែម្ចាស់រថយន្តនិងកម្លាំងសមត្ថកិច្ចបានជួយយកម្រេចចេញពុំបានឆេះទេ ។
បច្ចុប្បន្នរថយន្តនោះកម្លាំងជំនាញបានប្រាប់ឱ្យម្ចាស់រករថយន្តស្ទូចចេញពីកន្លែងកើតហេតុនោះ ៕ដោយ៖ស សម
