សារព័ត៌មាន នគរវត្ត តែងតែនាំមុខគេជានិច្ច
អាមេរិកបានប្រកាសថា នឹងមិនចូលរួមនៅក្នុង ការអភិវឌ្ឍន៍និងចែកចាយវ៉ាក់សាំងប្រឆាំងកូវីដ-១៩នៅលើពិភពលោក ។
ប្រធានាធិបតីអាមេរិកដូណាល់ ត្រាំបានប្រកាសថា លោកនឹងមិនចូលរួមគម្រោងផលិតវ៉ាក់សាំង របស់អង្គការសុខភាពពិភពលោកឡើយ ដោយ អាមេរិក នឹងផលិតវ៉ាក់សាំងដាច់ដោយឡែករបស់អាមេរិក ។ នៅពេលនេះអាមេរិក មានគោលដៅ ផលិតវ៉ាក់សាំង៣០០លានដូសឲ្យបានមុនខែមករាឆ្នាំ២០២១។
កាលពីខែសីហា អង្គការសុខភាពពិភពលោក បានប្រកាសថា មាន១៧០ប្រទេសចូលរួមក្នុងកិច្ចពិភាក្សា ស្តីពីមូលដ្ឋាន វ៉ាក់សាំងកូវីដ-១៩ លើពិភពលោកដែលហៅថា (Covax)។
បច្ចុប្បន្នប្រទេសជាច្រើនស្ថិតនៅក្នុងដំណាក់កាលចុងក្រោយ នៃការធ្វើតេស្តវ៉ាក់សាំងប្រឆាំងកូវីដ-១៩ ហើយនៅពេលដ៏ខ្លីខាងមុខ ពិភពលោក និងមានវ៉ាក់សាំងប្រឆាំងកូវីដ-១៩ ប្រើប្រាស់។
គិតមកដល់ ទី០២ ខែកញ្ញា ឆ្នាំ២០២០នេះ «ជំងឺរាតត្បាតជាសកល»កូវីដ-១៩ បានវាយលុកចូលដល់ប្រទេស និងដែនដីសរុបចំនួន ២១៥ ហើយ។ ជំងឺរាតត្បាតដ៏កាចសាហាវមួយនេះ វាបានចម្លងទៅមនុស្សសរុបចំនួន ២៥,៩៣៤,៨៥១នាក់ ដែលក្នុងនោះអ្នកជំងឺចំនួន ៨៦១,៨៩៦នាក់បានស្លាប់ និង ១៨,២១៦,៨៩៩នាក់ផ្សេងទៀត ត្រូវបានព្យាបាលឲ្យជាសះស្បើយ។
ក្នុងចំណោមប្រទេសដែលមានករណីឆ្លងកូវីដ-១៩ច្រើន ជាងគេគឺ អាមេរិក មានករណីឆ្លងដល់ទៅ ជាង៦,២លាននាក់ ប្រេស៊ីលជាង៣,៩លាននាក់ ឥណ្ឌាជាង៣,៧លាននាក់និងរុស្ស៊ីជាង១លាននាក់។ នេះជា៤ប្រទេសដែលមានករណីឆ្លងលើសពី១លាននាក់ ក្រៅពីនេះគឺឆ្លងក្រោម ៧សែននាក់ចុះ៕ដោយ៖ធី រីណា
