សារព័ត៌មាន នគរវត្ត តែងតែនាំមុខគេជានិច្ច
មជ្ឈមណ្ឌលគ្រប់គ្រងនិងបង្ការជំងឺអាមេរិក (CDC) នៅថ្ងៃទី ២ ខែកញ្ញាបានស្នើមន្ត្រីសុខាភិបាលរដ្ឋទាំង៥០របស់អាមេរិកត្រៀមលក្ខណៈទទួលវ៉ាក់សាំងប្រឆាំងកូវីដ-១៩ ដែលនឹងចែកចាយដល់ក្រុមពលរដ្ឋដែលប្រឈមការឆ្លងរាលដាលខ្ពស់។ តាមគម្រោងនៅចុងខែតុលា ខាងមុខ អាមេរិកនឹងចែកចាយវ៉ាក់សាំងជាផ្លូវការ។
ក្រុមអ្នកឯកទេសវិភាគបានលើកឡើងថា ការចែកចាយនៅចុងខែតុលា ហើយនៅថ្ងៃទី៣ដើមខែវិច្ឆិកានោះគឺជាពេលវេលាបោះឆ្នោតជ្រើសរើសប្រធានាធិបតីអាមេរិក។ លោកត្រាំសង្ឃឹមថាវ៉ាក់សាំងគឺជាអាវុធសំខាន់សម្រាប់យកឈ្នះគូប្រជែងក្នុងការបោះឆ្នោត បន្តដឹកនាំអាមេរិកមួយអាណត្តិទៀត។ ក្តីសង្ឃឹមដើម្បីយកឈ្នះរបស់លោកត្រាំ គឺវ៉ាក់សាំងទាំងនោះ ដូច្នេះលោកត្រាំខិតខំបញ្ចេញឲ្យទាន់ពេលវេលា។
លោកត្រាំបានសន្យាចំណាយប្រាក់រាប់សិបពាន់លានដុល្លារដើម្បីអភិវឌ្ឍនិងផលិតវ៉ាក់សាំងប្រឆាំងកូវីដ-១៩ចែកចាយដល់ពលរដ្ឋ។ បច្ចុប្បន្នអាមេរិក មានអ្នកស្លាប់ដល់ទៅជាង១៨៩ពាន់នាក់ និងឆ្លងជាង៦,២លាននាក់។
សារព័ត៌មានរ៉យទ័រ បានផ្សាយថា មជ្ឈមណ្ឌលគ្រប់គ្រងនិងបង្ការជំងឺអាមេរិក (CDC) បានផ្តល់ឲ្យបណ្តារដ្ឋនូវគម្រោង សហការចែកចាយវ៉ាក់សាំងមានកម្រិត នៅចុងខែតុលា និងខែវិច្ឆិកា។
នៅពេលនេះដែរ ក្រុមអ្នកជំនាញឱសថរបស់អាមេរិកកំពុងតែវាយតម្លៃ ថាតើប្រភេទវ៉ាក់សាំងប្រឆាំងកូវីដ-១៩ណាដែល មានប្រសិទ្ធភាព និងសុវត្ថិភាពសម្រាប់ប្រើប្រាស់បាននៅខែវច្ឆិកាឬខែធ្នូ ឆ្នាំ២០២០នេះ៕ដោយ៖ធី រីណា
