សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ដើម្បីជាការសងសឹកជាមួយប្រទេសចិនវិញ រដ្ឋមន្ត្រីការបរទេសអាមេរិក លោក ម៉ៃក៍ ប៉ុមប៉េអូ នៅថ្ងៃព្រហស្បតិ៍ទី៣ ខែកញ្ញានេះ បានអះអាងថា ខ្លួននឹងដាក់ការរឹតត្បិតបន្ថែមទៀត ទៅលើបណ្តាមន្ត្រីទូតចិន ។រដ្ឋមន្ត្រីការបរទេសអាមេរិករូបនេះ បានសង្កត់ធ្ងន់ថាចាប់ពីពេលនេះតទៅខ្លួននឹងតម្រូវឱ្យមន្ត្រីទូតជាន់ខ្ពស់ចិន ស្នើសុំការអនុញ្ញាតពី ក្រសួងការបរទេសអាមេរិកជាមុនសិន មុននឹងចង់បំពេញទស្សនកិច្ច ទៅកាន់សាកលវិទ្យាល័យអាមេរិកនានា ឬក៏រៀបចំព្រឹត្តិការណ៍វប្បធម៌ ដែលមានមនុស្សច្រើនជាង ៥០នាក់ចូលរួម។
បើតាមការចេញផ្សាយ ដោយសារព័ត៌មាន Sputnik នៅព្រឹកថ្ងៃព្រហស្បតិ៍ទី០៣ ខែកញ្ញា ឆ្នាំ២០២០នេះ ដោយដកស្រង់សេក្តីប្រកាសរបស់រដ្ឋមន្ត្រីការបរទេសអាមេរិក លោក ម៉ៃក៍ ប៉ុមប៉េអូ នាឱកាសធ្វើសន្និសីទសារព័ត៌មានខ្លីមួយ និងជាការឆ្លើយចំពោះទីក្រុងប៉េកាំង ដែលបានដាក់វិធានការរឹតត្បិតជាច្រើន លើមន្ត្រីទូតអាមេរិកនៅក្នុងប្រទេសចិន ព្រមទាំងជាផ្នែកមួយនៃយុទ្ធនាការរបស់រដ្ឋបាលលោក ដូណាល់ ត្រាំ ប្រឆាំងនឹងឥទ្ធិពល និងការស៊ើបការណ៍សម្ងាត់របស់ចិន។
បន្ថែមពីនេះ លោក ប៉ុមប៉េអូ បានគូសបញ្ជាក់ថា ក្រសួងការបរទេសអាមេរិកក៏នឹងចាត់វិធានការអមដោយសកម្មភាពផងដែរ ដើម្បីធានាឱ្យបានថា គណនីបណ្ដាញទំនាក់ទំនងសង្គមនៃរាល់មន្ត្រីស្ថានទូត និងស្ថានកុងស៊ុលចិនទាំងអស់ គឺជាគណនីពិតប្រាកដ។
យ៉ាងណាក៏ដោយ ស្ថានទូតចិនប្រចាំទីក្រុងវ៉ាស៊ីនតោន បានចាត់ទុកថាការសម្រេចចិត្តរបស់សហរដ្ឋអាមេរិក គឺជាទង្វើអយុត្តិធម៌ និងបង្កឧបសគ្គដល់មន្ត្រីទូត និងស្ថានកុងស៊ុលចិន ដែលនេះគឺផ្ទុយទាំងស្រុង ទៅនឹងអ្វីដែលអាមេរិកខ្លួនឯងតែងតែអះអាងថា ជាអ្នកការពារសិទ្ធិសេរីភាព និងភាពបើកចំហ៕ដោយ៖ស តារា
