សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក គុជ គឹមឡុង អ្នកនាំពាក្យអយ្យការអមសាលាដំបូងរាជធានីភ្នំពេញ បានថ្លែងតាមបណ្តាញសង្គម Telegram នៅព្រឹកថ្ងៃទី៦ ខែកញ្ញា ឆ្នាំ២០២០នេះថា តំណាងអយ្យការបានសម្រេចចោទប្រកាន់យុវជន៣នាក់ពីបទ «ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម» តាមមាត្រា៤៩៤ និង មាត្រា ៤៩៥ នៃក្រមព្រហ្មទណ្ឌ ។
បច្ចុប្បន្ននេះ ជនត្រូវចោទទាំង៣នាក់និង សំណុំរឿង ត្រូវបានបញ្ជូនទៅចៅក្រមស៊ើបសួរចាត់ការបន្តតាមនីតិវិធី ។
យុវជនទាំង៣នាក់ដែលអះអាងថាជាអ្នកការពារបរិស្ថាន រួមមានឈ្មោះ ថុង រដ្ឋា ឈ្មោះ ឡុង គន្ធា និង ឈ្មោះ ភួន កែវរស្មី ។
ឈ្មោះ ថុង រដ្ឋា ត្រូវបានសមត្ថកិច្ចឃាត់ខ្លួននៅក្នុងផ្ទះជួលក្នុងខណ្ឌពោធិ៍សែនជ័យ ក្រោមហេតុផលបង្កើតបន្ទប់ផ្សព្វផ្សាយព័ត៌មាន និងធ្វើវិដេអូផ្សាយដោយមិនមានច្បាប់អនុញ្ញាត ។
ដោយឡែក ពួកគេទាំង៣នាក់ត្រូវបានរកឃើញថា បានធ្វើសកម្មភាពបង្ហាញពីការគាំទ្រនិងស្រឡាញ់បរិស្ថានគ្រាន់តែជាលេស ប៉ុន្តែទង្វើពួកគេមានចេតនាបង្កភាពភាន់ច្រឡំដល់មហាជន និងមានចេតនាបង្កភាពវឹកវរដល់សង្គម ៕
ដោយ៖ចេស្តា
