ដោយសារព្រួយបារម្ភពីការចាប់ខ្លួន អ្នកកាសែតអូស្រ្តាលី ២នាក់ រត់ចេញពីប្រទេសចិន យ៉ាងតក់ក្រហល់

អន្តរជាតិ៖ បើយោងតាមទីភ្នាក់ងារសារព័ត៌មាន CNA នៅថ្ងៃអង្គារ ទី៨ខែកញ្ញា ឆ្នាំ២០២០នេះ បានចេញផ្សាយថា៖ ក្រោយអាជ្ញាធរចិន បានឃុំខ្លួនអ្នកកាសែតជនជាតិអូស្ត្រាលីម្នាក់ ដែលបម្រើការងារឲ្យបណ្ដាញទូរទស្សន៍ចិន CGTN ស្រាប់តែថ្មីៗនេះ អ្នកកាសែតអូស្រ្តាលី ២នាក់បានសម្រេចចាកចេញពីប្រទេសចិន យ៉ាងតក់ក្រហល់ទាំងយប់ បន្ទាប់ពីត្រូវបានប៉ូលីសចិន តាមស្វែងរកដើម្បីសួរចម្លើយ។

បើតាម ABC News លោក បឺតថល ជាអ្នកកាសែតប្រចាំទីក្រុងប៉េកាំងនិងលោក ស្មីត ជាអ្នកធ្វើការនៅក្នុងទីក្រុងសៀងហៃ (Shanghai) ហើយអ្នកទាំងពីរ បានស្នាក់នៅក្នុងការិយាល័យ ការទូតអូស្ត្រាលីជាច្រើនថ្ងៃ មុនពេលត្រូវបានអនុញ្ញាតឲ្យចាកចេញពីប្រទេសចិន។ ដោយការចាកចេញរបស់អ្នកកាសែត ABC News លោក បៀល បឺតថល (Bill Birtles) និងអ្នកឆ្លើយឆ្លងព័ត៌មាន នៃកាសែត Financial Review លោក មីឆែល ស្មីត(Michael Smith) បានកើតឡើងមួយរយៈពេលខ្លីប៉ុណ្ណោះ ក្រោយអាជ្ញាធរចិន ឃុំខ្លួនអ្នកកាសែតជនជាតិអូស្ត្រាលីម្នាក់ បម្រើការងារឲ្យបណ្ដាញទូរទស្សន៍ចិន CGTN។

ទីភ្នាក់ងារសារព័ត៍មាន ABC News និយាយទៀតថា ក្រុមប៉ូលីសចិន៧នាក់ បានចុះទៅឆែកឆេរនៅក្នុងផ្ទះរបស់លោក បឺតថល ទាំងកណ្ដាលអាធ្រាត្រ កាលពីថ្ងៃព្រហស្បតិ៍សប្ដាហ៍មុន ដើម្បីសាកសួរពីករណីទាក់ទងនឹងសន្តិសុខជាតិ ។

សូមជម្រាប បច្ចុប្បន្ន លោក បឺតថល និងលោក ស្មីត បានហោះចេញពីទីក្រុងសៀងហៃ អមដំណើរដោយអ្នកការទូតអូស្ត្រាលី កាលពីថ្ងៃចន្ទម្សិលមិញ និងបានទៅដល់ទីក្រុងស៊ីដនី នៅព្រឹកថ្ងៃអង្គារនេះ ៕ដោយ៖សតារា