សារព័ត៌មាន នគរវត្ត តែងតែនាំមុខគេជានិច្ច
ទីក្រុងតូក្យូប្រទេសជប៉ុន បានសម្រេច បន្ថយការប្រកាសអាសន្នមួយកម្រិតពាក់ព័ន្ធការឆ្លងកូវីដ-១៩ ក្រោយរក្សាការប្រកាសអាសន្នកម្រិតខ្ពស់បំផុតរយៈពេល២ខែកន្លងមក។
សារព័ត៌មានTTXVN បានផ្សាយថា នៅថ្ងៃទី១០ខែកញ្ញា មន្ត្រីជប៉ុន បានសម្រេចបន្ថយការរឹតត្បិតស្របទៅតាមក្រុមប្រឹក្សាសុខាភិបាល បានវាយតម្លៃពីស្ថានភាពកូវីដ-១៩ ។
អភិបាលទីក្រុងតូក្យូលោក Yuriko Koike បានប្រកាសថា ទីក្រុងតូក្យូមានគម្រោង លុបច្បាប់បម្រាម ដល់ ក្លិបរាត្រី ខារ៉ាអូខេ …ចាប់ពីថ្ងៃទី ១៥ខែកញ្ញា។
តាមតួលេខថ្មីបំផុតបង្ហាញឲ្យឃើញថាក្នុងរយៈពេល ៧ថ្ងៃកន្លងមក ចំនួនអ្នកឆ្លងកូវីដ-១៩ ជាមធ្យម នៅក្នុងទីក្រុងតូក្យូក្នុងពេលមួយថ្ងៃមាន១៤៩នាក់ គឺថយចុះពី១៨៣នាក់ ក្នុងមួយថ្ងៃកាលពីសប្តាហ៍មុន។ បច្ចុប្បន្ន ទីក្រុងតូក្យូមានករណីឆ្លងកូវីដ-១៩សរុប២២.៤៤៤នាក់។
ករណីឆ្លងកូវីដ-១៩ ក្នុងប្រទេសជប៉ុនមាន មានការថយចុះជាបន្តបន្ទាប់ ប៉ុន្តែរដ្ឋាភិបាលត្រូវតែមានការប្រុងប្រយ័ត្នខ្ពស់ខ្លាចមានករណីឆ្លងជាថ្មីកើតឡើង។
នៅទូទាំងប្រទេសជប៉ុន មានចំនួនអ្នកឆ្លងសរុប ៧២.៧២៦ នាក់ និងស្លាប់១៣៩៣នាក់ ។
ជប៉ុនស្ថិតនៅលេខរៀងទី៤៥ ជាប្រទេសដែលមានចំនួនអ្នកឆ្លងកូវីដ-១៩ច្រើនជាងគេ។ បច្ចុប្បន្ននៅលើពិភពលោក មានអ្នកឆ្លងសរុបជាង២៨លាននាក់ហើយ៕
ដោយ៖ធី រីណា
