សារព័ត៌មាន នគរវត្ត តែងតែនាំមុខគេជានិច្ច
ខេត្កណ្ដាល ៖ នារសៀលថ្ងៃទី២៣ ខែកញ្ញា ឆ្នាំ២០២០ម្សិលមុិញនេះ លោកឧត្ដមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល បានដឹកនាំគណៈស្នងការ នាំយកអាវភ្លៀងជាអំណោយ នាយឧត្ដមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ជូនកងកម្លាំងនគរបាលនៃអធិការដ្ឋាននគរបាលស្រុកកោះធំ និងស្រុកស្អាង សរុបចំនួន២៤២នាក់។ ក្នុងនោះកម្លាំងអធិការដ្ឋានស្រុកកោះធំចំនួន១០៦នាក់ និងស្រុកស្អាងចំនួន១៣៦នាក់។
លោកឧត្ដមសេនីយទោ ឈឿន សុចិត្ត ស្នងការនគរបាលខេត្តកណ្ដាល បានសម្ដែងសេចក្ដីរីករាយដែលបានជួបសំណេះសំណាលជាមួយកម្លាំងអធិការដ្ឋានទាំងពីរស្រុក និងថ្លែងអំណរគុណចំពោះស្មារតីទទួលខុសក្នុងតួនាទីភារកិច្ចរក្សាសន្តិសុខសណ្ដាប់ធ្នាប់ជូនប្រជាពលរដ្ឋកន្លងទៅ។ ជាពិសេសដែលកងកម្លាំងទាំងអស់បានលះបង់ទាំងកម្លាំងកាយចិត្តពេលវេលាពីគ្រួសារ បង្កលក្ខណៈងាយស្រួលដល់ប្រជាពលរដ្ឋបានចូលរួមធ្វេីបុណ្យធ្វេីទានក្នុងពិធីកាន់បិណ្ឌនិងភ្ជុំបិណ្ឌប្រកបដោយសេចក្ដីជ្រះថ្លា ផ្សារភ្ជាប់នឹងសន្តិសុខយ៉ាងល្អប្រសេីរ។
ក្នុងឱកាសនោះដែរ លោកស្នងការ ក៏បានលេីកឡេីងនូវអនុសាសន៍ផ្ដាំផ្ញេីពីសំណាក់ នាយឧត្ដមសេនីយ៍ សន្តិបណ្ឌិត អគ្គស្នងការនគរបាលជាតិ ដោយជំរុញឱ្យកងកម្លាំងទាំងអស់បន្តស្មារតីទទួលខុសត្រូវសាមគ្គីផ្ទៃក្នុង គោរពស្រឡាញ់ពីលេីដល់ក្រោម ពីក្រោមឡេីងលេី ប្ដេជ្ញាការពារសន្តិភាព ស្ថេរភាពសង្គម។ ក្រៅពីនេះ កងកម្លាំងត្រូវអនុវត្តឱ្យបាននូវគោលនយោបាយភូមិឃុំមានសុវត្ថិភាព ដែលជាស្នូលនៃសន្តិសុខមូលដ្ឋាន។
ក្រៅពីអាវភ្លៀងដែលជាអំណោយនាយឧត្ដមសេនីយ៍ សន្ដិបណ្ឌិត អគ្គស្នងការនគរបាលជាតិ លោកស្នងការ ក៏បានប្រកាសផ្ដល់ម៉ូតូប្រដេញក្នុងមួយអធិការដ្ឋានចំនួន៥គ្រឿង(នឹងប្រគល់នៅពេលក្រោយ) ថវិកាមួយចំនួនពីលោកអភិបាលស្រុក និងសប្បុរសជនមួយចំនួនទៀត៕
ដោយ៖ សិលា
