សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានបេីករថយន្តឡិចសុីសRX300 ទាំងស្រវឹងស្រាជាខ្លាំង ជ្រុលទៅបុកបង្គោលភ្លេីងកណ្ដាលទ្រូងផ្លូវបណ្តាលឱ្យរងការខូចខាតយ៉ាងដំណំ ។ ហេតុការណ៍នេះបានកេីតឡេីងកាលពីវេលាម៉ោង១០ និង៣០នាទីយប់ថ្ងៃទី២៤ ខែកញ្ញា ឆ្នាំ២០២០ នៅចំណុចស្តុបវត្តច្បារអំពៅ តាមបណ្ដោយផ្លូវជាតិលេខ១ ក្នុងសង្កាត់ច្បារអំពៅ១ ខណ្ឌច្បារអំពៅ រាជធានីភ្នំពេញ ។
តាមប្រភពព័ត៌មានពីប្រជាពលរដ្ឋដែលនៅកន្លែងកេីតហេតុបានឲ្យដឹងថា ដំបូងគេឃេីញរថយន្តម៉ាក Lexus RX300 ពណ៌ខ្មៅ ពាក់ស្លាកលេខភ្នំពេញ 2K-1642 ធ្វេីដំណេីរតាមបណ្ដោយផ្លូវជាតិលេខ១ ក្នុងទិសដៅពីលិចទៅកេីត ក្នុងល្បឿនលឿនល្មម តែរេចង្កូតពេញផ្លូវ ខណៈបើកឆ្លងស្តុបច្បារអំពៅក៏ជ្រុលទៅ
បុកបង្គោលភ្លេីងពេញទំហឹងបណ្ដាលឲ្យរថយន្តបង្កហេតុរួញផ្នែកខាងមុខខូចខាតយ៉ាងដំណំ រីឯបង្គោលភ្លេីងក៏ទ្រេតបន្តិចផងដែរ ។
ក្រោយកេីតហេតុ គេសង្គេតឃេីញតៃកុងរថយន្តបង្កដេកក្នុងរថយន្តធ្វេីព្រងេីយ បន្ទាប់មកក៏មានបងប្អូនសាច់ញាតិមកគ្រាហ៍ឡេីងរថយន្តមួយគ្រឿងទៀតទៅបាត់ ។ ក្រោយមកសមត្ថកិច្ចជំនាញចរាចរណ៍បានធ្វេីការវាស់វែងយករថយន្តបង្កហេតុខាងលេីទៅរក្សាទុកនៅការិយាល័យចរាចរណ៍ជេីងគោកនៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយតាមក្រោយ ៕
ដោយ៖ ភារ៉ា ដង្កោ
