សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់ដែលជាអ្នកយកព័ត៌មានឱ្យCBN TV បានស្លាប់នៅលើដងផ្លូវ ដែលគេកំពុងសង្ស័យថា ត្រូវបានគេវាយពីក្រោយបណ្ដាលឲ្យដួលបោកក្បាលនិឹងថ្នល់បន្ថែមស្លាប់ក្នុងថ្លុកឈាមយ៉ាងអាណោចអាធ័ម ។ ហេតុការណ៍នេះបានកើតឡើងកាលពីវេលាម៉ោងជាង២រំលងអធ្រាត្រ ឈានចូលថ្ងៃទី២៩ ខែកញ្ញា ឆ្នាំ២០២០នៅលើផ្លូវបេតុង ស្ថិតក្នុងភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
ជនរងគ្រោះដែលស្លាប់មានឈ្មោះ គូយ ពិសិដ្ឋ អាយុ២៤ឆ្នាំ មុខរបរ អ្នកសារព័ត៌មាននៅអង្គភាព CBN TV ស្នាក់នៅភូមិទំនប់១ សង្កាត់ភ្នំពេញថ្មី ខណ្ឌសែនសុខ និងមានស្រុកកំណើត នៅភូមិទួលមាស ឃុំតាអុង ស្រុកចំការលើ ខេត្តកំពង់ចាម ។
តាមប្រភពព័ត៌មានពីប្រជាពលរដ្ឋដែលរស់នៅក្បែរកន្លែងកេីតហេតុបានឲ្យដឹងដូចៗគ្នាថា នៅពេលកេីតហេតុ ពួកគាត់បានឮសំឡេងដួលម៉ូតូប្រ៉ាវ តែភ្លាមៗនោះពួកគាត់មិនបានចេញមកក្រៅផ្ទះដើម្បីពិនិត្យមេីលហេតុការណ៍នោះទេ លុះបន្តិចក្រោយមកពេលបើកទ្វារចេញមកមើលស្រាប់តែឃើញមនុស្សម្នាក់ដេកស្លាប់បាត់ទៅហើយ ឯម៉ូតូដួលកណ្ដាលផ្លូវ។ ក្រៅពីនេះគ្មានមនុស្សណាម្នាក់នៅជាមួយសពឡើយ។
បេីតាមប្រភពពីមន្ត្រីកងរាជអាវុធហត្ថខណ្ឌពោធិ៍សែនជ័យមួយរូបបានឲ្យដឹងថា រូបគាត់បានទាក់ទងទៅម្ចាស់ផ្ទះដែលមានកាមេរ៉ាសុវត្ថិភាពក្បែរកន្លែងកេីតហេតុឃេីញថា ជនរងគ្រោះត្រូវបានគេវាយពីក្រោយបណ្ដាលឲ្យដួលបោកក្បាលនិឹងថ្នល់បន្ថែមស្លាប់ក្នុងថ្លុកឈាមយ៉ាងដូច្នេះ រីឯជនដៃដល់បានគេចខ្លួនភ្លាមៗតែម្ដង ។
ជុំវិញករណីខាងលេីនេះ ខាងសមត្ថកិច្ចជំនាញកំពុងតែធ្វេីការស្រាវជ្រាវបន្ថែម និងយកចិត្តទុកដាក់បំផុត រីឯសាច់ញាតិសពក៏បានចុះទៅដល់កន្លែងកេីតហេតុ ដេីម្បីត្រៀមទទួលយកសពជនរងគ្រោះ ទៅធ្វេីបុណ្យតាមប្រពៃណី ៕ដោយ៖ ភារ៉ា ដង្កោ
