សារព័ត៌មាន នគរវត្ត តែងតែនាំមុខគេជានិច្ច
បើទោះបីរុស្ស៊ីជាប្រទេសមានវ៉ាក់សាំងប្រឆាំងកូវីដ-១៩មុនគេបង្អស់នៅលើពិភពលោកក្តី ប៉ុន្តែប្រទេសនេះនៅតែបន្តរឹតត្បិតទប់ស្កាត់ការឆ្លងកូវីដ-១៩។
នៅពេលនេះដែរអភិបាលក្រុងមូស្គូ លោក Sergei Sobyanin នៅថ្ងៃទី២៩ខែកញ្ញា បានប្រកាសថា ទីក្រុងមូស្គូ នឹងបន្តឲ្យសិស្សសាលាសម្រាកក្នុងខែតុលាជាបន្តទៀត ដើម្បីទប់ស្កាត់ការឆ្លង ។ ប៉ុន្តែនៅក្នុងខែតុលាសិស្ស នឹងបន្តឈប់តែ២សប្តាហ៍ដើមខែតែប៉ុណ្ណោះ គឺដល់ថ្ងៃទី១៨ខែតុលា។ ជាមួយគ្នានោះដែរ លោក Sergei Sobyanin បានស្នើដល់ពលរដ្ឋដែលមានវ័យ៦៥ឆ្នាំឡើងត្រូវតែ ស្នាក់នៅក្នុងផ្ទះបញ្ចៀសការឆ្លងកូវីដ-១៩។
បច្ចុប្បន្ន រុស្ស៊ី មានករណីឆ្លងកូវីដ-១៩សរុប ១.១៥៩.០០០ នាក់ ឈរលំដាប់ទី៤នៅលើពិភពលោក។ ជាមួយគ្នានេះរុស្ស៊ីក៏មានអ្នកស្លាប់ ២០,៥៤៥នាក់ផងដែរ។ នៅក្នុងខែតុលា រុស្ស៊ីនឹងមានគម្រោងចាក់វ៉ាក់សាំងប្រឆាំងកូវីដ-១៩ ដល់ពលរដ្ឋទូទៅ ។
គិតមកដល់ម៉ោង៦ល្ងាចថ្ងៃទី ២៩ ខែកញ្ញា ឆ្នាំ២០២០ តាមគេហទំព័រ Worldometers ចំនួនអ្នកឆ្លងកូវីដ-១៩ នៅទូទាំងពិភពលោក កើនឡើងដល់ទៅជាង ៣៣,៥លាននាក់ និងស្លាប់ជាងមួយលាននាក់ ។ ប្រទេសមានអ្នកឆ្លងលើសពី១លាននាក់ មាន៤ប្រទេស គឺអាមេរិក មានអ្នកឆ្លងជាង៧,៣លាននាក់ ឥណ្ឌាមានអ្នកឆ្លងជាង៦លាននាក់ ប្រេស៊ីលមានអ្នកឆ្លងជាង៤,៧លាននាក់ និងរុស្ស៊ីមានអ្នកឆ្លង ជាង១លាននាក់ ៕ដោយ៖ធី រីណា
