សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង៖ បុគ្គលិកក្រុមហ៊ុនអចលនទ្រព្យអិលអូឌីLOD ចំនួន៤នាក់ក្នុងនោះមានម្នាក់ជាប្រធានសាខាខេត្ដកំពង់ឆ្នាំង បានសំរុកចូលផ្ទះមេភូមិហើយមកកាត់សោរច្រវ៉ាក់ ដើម្បីរឹបអូសម៉ូតូ មួយគ្រឿងពីកូនបំណុល ដោយមិនមានការអនុញាតិពីស្ថាប័នអយ្យការអមសាលាដំបូងខេត្ត ដោយសារកូនបំណុល ខកខានមិនបានបង់ការប្រាក់រយះពេល៣ខែ ប៉ុណ្ណោះ ។
ហេតុការណ៍ខាងលើនេះ បានកើតឡើងនៅថ្ងៃទី២៩ ខែកញ្ញាឆ្នាំ២០២០ ស្ថិតនៅភូមិកំពង់បាស្រូវខាងត្បូង ឃុំជលសារ ស្រុកជលគិរី ខេត្តកំពង់ឆ្នាំង។
ប្រភពបន្ដថា បន្ទាប់ពីប្រជាពលរដ្ឋបានឃើញហេតុការណ៍ ដ៏សាហាវគ្មានធម៌មេត្តា របស់បុគ្គលិក ក្រុមហ៊ុនអិលអូឌី LOD ធ្វើសកម្មភាពដូចប្លន់មានលក្ខណៈហឹង្សា ក៏បានរាយការណ៍ប្រាប់សមត្ថកិច្ចមូលដ្ឋាន ចុះជួយធ្វើអន្តរគមន៍ភ្លាមៗ ។
បន្ទាប់មកលោក អ៉ិត សុធា ព្រះ រាជអាជ្ញាអយ្យការអមសាលាដំបូង ខេត្តកំពង់ឆ្នាំង បានទទួលព័ត៌មាននេះភ្លាម លោកបានបញ្ជាឲ្យកម្លាំងកងរាជអាវុធហត្ថស្រុកជលគីរី ចុះឃាត់ខ្លួនយុវជន៤នាក់ ជាបុគ្គលិក ក្រុមហ៊ុនអចលនទ្រព្យអិលអូឌីតែម្តង ។
ប្រភពព័ត៌មានបន្ដថា មូលហេតុដែលបុគ្គលិករបស់ក្រុមហ៊ុនហ៊ានប្រើហិង្សាក្នុងការរឹបអូសទ្រព្យកូនបំណុល ក្នុងដំណាក់កាលកូវីដ–១៩ ដោយសារតែម្ចាស់ក្រុមហ៊ុន អចលនទ្រព្យអិលអូឌី LOD មានឋានៈជារដ្ឋលេខាធិការនៃក្រសួងមួយរូបផងដែរ ។
ជនសង្ស័យទាំង៤នាក់ ខាងលើមាន៖
ទី១. ឈ្មោះ វ៉ែន រិត ភេទប្រុស អាយុ២៧ ឆ្នាំរស់នៅភូមិជារៅ.ឃុំរលាប្អៀរ.ស្រុករលាប្អៀរ។
ទី២.ឈ្មោះ ញ៉េសសារីនភេទប្រុស.អាយុ២១ឆ្នាំរស់នៅភូមិពារាំង.ឃុំចោងម៉ោង.ស្រុកសាមគ្គីមានជ័យ។
ទី៣.ឈ្មោះ អៀន វណ្ណា ភេទប្រុស អាយុ២៧ ឆ្នាំរស់នៅភូមិននៀមទទឹង.ឃុំទឹកហូត.ស្រុករលាប្អៀរ ខេត្តកំពង់ឆ្នាំង។
ទី៤.ឈ្មោះ ហេង គង្គា អាយុ២៨ឆ្នាំ រស់នៅភូមិស្រែព្រីង សង្កាត់កំពង់ឆ្នាំង.ក្រុងកំពង់ឆ្នាំង. ខេត្តកំពង់ឆ្នាំង មានតួនាទីជាប្រធានសាខាខេត្តកំពង់ឆ្នាំង ជាអ្នកផ្តើមគំនិតចំណែកវត្ដុតាងសមត្ថកិច្ច ដកហូតរួមមានម៉ូតូចំនួន០២គ្រឿង ។
គួរបញ្ជាក់ផងដែរថា ដោយសារបុគ្គលិកក្រុមហ៊ុនអចលនទ្រព្យអិលអូឌីLODទាំងនេះ អនុវត្តបញ្ច្រាស់ទិស ពីអនុសាសន៍ ដ៏ខ្ពង់ខ្ពស់របស់សម្តេចតេជោហ៊ុនសែននាយករដ្ឋមន្រ្តីនៃព្រះរាជាណាចក្រកម្ពុជា ដែលបានសំណូមពរឲ្យក្រុមហ៊ុនអចលនទ្រព្យទូទាំងប្រទេស មេត្តាយោគយល់ និងលើកលែង ដល់បងប្អូនប្រជាពលរដ្ឋ ដែលកំពុងតែមានជីវភាពលំបាកខ្វះខាត ក្នុងដំណាក់កាលការពារទប់ស្កាត់ការឆ្លងរីករាលដាលមេរោគកូវីដ-១៩ និងហាមមិនឲ្យរឹបអូសទ្រព្យសម្បត្តិ កូនបំណុល។
បច្ចុប្បន្នជនសង្ស័យទាំង៤នាក់ ត្រូវបានឃាត់ខ្លួនពីបទបំផ្លិចបំផ្លាញទ្រព្យសម្បត្តិអ្នកដ៏ទៃដោយចេតនា ត្រូវបានបញ្ជូនមកទីបញ្ជាការកងរាជអាវុធហត្ថខេត្តកំពង់ឆ្នាំង ដើម្បីកសាងសំណុំរឿងបញ្ជូនទៅតុលាការនៅព្រឹកថ្ងៃទី៣០ ខែកញ្ញាឆ្នាំ២០២០ ដើម្បីចាត់ការតាមផ្លូវច្បាប់៕ដោយ៖សហការី
