សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានដួលបោកក្បាលស្លាប់នៅលេីដងផ្លូវជាតិលេខ៤គួរឲ្យរន្ធត់បំផុត បន្ទាប់ពីជិះម៉ូតូបញ្ច្រាសទិសទៅបុកជាមួយរថយន្តសាំយ៉ុងពីមុខយ៉ាងពេញទំហឹងកាលពីវេលាម៉ោង២ និង៣០នាទីរំលងអធ្រាត្រឈានចូលថ្ងៃទី២ ខែតុលា ឆ្នាំ២០២០ នៅតាមបណ្ដោយផ្លូវជាតិលេខ៤ ក្នុងភូមិបែកចាន ឃុំបែកចាន ស្រុកអង្គស្នួល ខេត្តកណ្ដាល ។
សពជនរងគ្រោះនៅមិនទាន់ស្គាល់អត្តសញ្ញាណនោះទេ ដោយជិះម៉ូតូម្នាក់ឯង ម៉ាក Honda Click ពណ៌ទឹកក្រូចលាយខ្មៅ ពាក់ស្លាកលេខភ្នំពេញ 1AN-6003 ។
តាមប្រភពព័ត៌មានពីកន្លែងកើតហេតុបានឲ្យដឹងថា រថយន្តសាំយ៉ុង ពណ៌ស ពាក់ស្លាកលេខភ្នំពេញ 2K-4407 បានដឹកបន្លែចេញពីខេត្តកំពង់ស្ពឺក្នុង គោលបំណងយកមកលក់នៅផ្សារដេីមគ ដោយធ្វេីដំណេីរក្នុងរថយន្តមានគ្នីគ្នា៤ទៅ៥នាក់ ខណៈមកដល់ចំណុចកើតហេតុខាងលេី ក៏មានបុរសម្នាក់ជិះម៉ូតូមួយគ្រឿងម៉ាក Honda Click ធ្វេីដំណេីរបញ្ច្រាសទិសគ្នា មកបុកជាមួយរថយន្តសាំយ៉ុងចំពីមុខពេញទំហឹងបណ្ដាលឲ្យបុរសភាគីខាងម៉ូតូដួលបោកក្បាលស្លាប់ភ្លាមៗនៅនឹងកន្លែង ។ រីឯរថយន្តសាំយ៉ុងបានបេីកទៅមុខទាំងបែកកង់ជិត២០០ម៉ែត្រ ក៏ត្រូវប្រជាពលរដ្ឋឃាត់បានទាំងរថយន្ត និងតៃកុងប្រគល់ឲ្យសមត្ថកិច្ច ។
ក្រោយកេីតហេតុ រថយន្តសាំយ៉ុងដឹកបន្លែខាងលេីត្រូវបានបងប្អូនតៃកុងរថយន្ត ហៅរថយន្តសាំយ៉ុងមួយគ្រឿងទៀតមកសាងបន្លែ ដេីម្បីយកទៅលក់បន្តនៅផ្សារដេីមគ ។ រីឯរថយន្តសាំយ៉ុង និងម៉ូតូជនរងគ្រោះ ត្រូវសមត្ថកិច្ចមូលដ្ឋាន សហការជាមួយសមត្ថកិច្ចជំនាញចរាចរណ៍ធ្វេីការវាស់វែងយកទៅរក្សាទុក រង់ចាំដោះស្រាយតាមក្រោយ ។ ដោយឡែកសពជនគ្រោះត្រូវបានសមត្ថកិច្ចប្រគល់ឲ្យក្រុមគ្រូពេទ្យដឹកយកទៅរក្សាទុកនៅសាលរក្សាសព រង់ចាំទាក់ទងទៅសាច់ញាតិមកទទួលយកទៅធ្វេីបុណ្យតាមប្រពៃណី ៕ ដោយ៖ ភារ៉ា ដង្កោ
