សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ តោះអ្នកណាខ្លះធ្លាប់ត្រូវមន្ត្រីជាប់កិច្ចសន្យារបស់សាលារាជធានីភ្នំពេញម្នាក់ ដែលស្លៀកពាក់ស្រដៀងនឹងនគរបាលចរាចរណ៍ជើងគោកហើយតែងតែចេញមកឃាត់រថយន្តពិន័យយកលុយរាល់ថ្ងៃ ចុងក្រោយអស់ល័ក្ខ ព្រោះតែឃាត់ប៉ះចំរថយន្តរបស់លោកឧត្តមសេនីយ៍ត្រី ទី ចំរើនកុសល ។
ជាក់ស្តែងបើយោងតាមបណ្ដាញសង្គមហ្វេសប៊ុកផ្ទាល់ខ្លួនរបស់លោកឧត្តមសេនីយ៍ត្រី ទី ចំរើនកុសល បានបង្ហោះវីដេអូនៅពេលថ្មីៗនេះដោយបង្ហាញអំពីសកម្មភាពរបស់មន្ត្រីជាប់កិច្ចសន្យារបស់សាលារាជធានីភ្នំពេញតែបែរជាចេញមកឃាត់រថយន្តនៅតាមផ្លូវឱ្យឈប់ដើម្បីពិន័យ ដូចជាមន្ត្រីនគរបាលចរាចរណ៍ទៅវិញ។ លោកបន្ថែមថា ក្រុមទាំងនោះ គឺគ្មានសិទ្ធិឃាត់រថយន្តឈប់ទេ ។
យោងតាមការបង្ហោះសាររបស់លោកឧត្តមសេនីយ៍ត្រី ទី ចំរើនកុសល បានសរសេរខ្លឹមសារទាំងស្រុងថា៖ «សូមចំណាំ !!!
គាត់មិនមែនជានគរបាលចរចរណ៍ទេ។ គាត់គឺជាមន្ត្រីជាប់កិច្ចសន្យារបស់សាលារាជធានីភ្នំពេញ។ ចំណុចសម្គាល់ គឺគ្មានពាក់សក្តិលើស្មាគ្មានស្លាកសញ្ញានគរបាលនៅលើសម្លៀកបំពាក់។តើតួនាទី និងភារកិច្ចរបស់មន្ត្រីជាប់កិច្ចសន្យា ធ្វើអ្វីខ្លះ? គឺជួយសហការជាមួយនគរបាលចរាចរណ៍ដើម្បីសម្រួលចរាចរណ៍ តែគ្មានសិទ្ធិចេញមកបញ្ឈប់រាល់យានយន្តដែលល្មើសនឹងច្បាប់ចរាចរណ៍នៅលើដងផ្លូវសាធារណៈដោយឯកឯងដូចនៅក្នុងវីដេអូនេះបានទេ។
លោកឧត្តមសេនីយ៍ត្រី ទី ចំរើនកុសល បន្តថា រូបភាពនេះកើតឡើងកាលពីថ្ងៃទី២៧ ខែកញ្ញា ឆ្នាំ២០២០ មកម៉្លេះ ហើយខ្ញុំបានរាយការណ៍ជូនថ្នាក់ដឹកនាំរួចហើយដែរ ថ្នាក់ដឹកនាំក៏កំពុងដាក់វិន័យបុគ្គលនេះតាមរូបភាពបញ្ឈរជើងនៅការិយាល័យនគរបាលចរាចរណ៍ផ្លូវគោករាជធានី។
ចុងក្រោយលោក ក៏បានសូមអំពាវនាវដល់មន្ត្រីជាប់កិច្ចសន្យារបស់សាលារាជធានីភ្នំពេញទាំងអស់ដែលកំពុងសហការជួយនគរបាលចរាចរណ៍តាមគោលដៅនានាក្នុងរាជធានីភ្នំពេញ សូមបញ្ឈប់សកម្មភាព ចេញហៅ ឬឃាត់ ឬបញ្ឈប់រាល់យានយន្តដែលល្មើសច្បាប់ចរាចរណ៍នៅលើដងផ្លូវសាធារណៈដោយឯកឯងតទៅទៀត ពីព្រោះអស់លោក លោកស្រី នាងកញ្ញាមិនមែនជានគរបាលចរាចរណ៍ទេ។សូមអរគុណ ៕សហការី
